ალეკო ელისაშვილი „ლელოს“, ანა დოლიძის და „თავისუფლების მოედნის“ გაერთიანებას შეუერთდა

„წყენებზე მაღლა დადგომის, შერიგების, ერთობის და გამარჯვების დროა!“, - Facebook-ზე ამ სათაურით გამოაქვეყნა ალეკო ელისაშვილმა „ლელოს“ თავმჯდომარე, მამუკა ხაზარაძესთან ერთად გადაღებული ფოტო.

წარსულში ალეკო ელისაშვილს და მამუკა ხაზარაძეს ერთმანეთი არაერთხელ გაუკრიტიკებიათ. ელისაშვილი „ლელოს“ დამფუძნებლებს „ბანკირებს“ და „ხალხის მყვლეფავებს“ უწოდებდა.

„კარგი მაგალითია სხვებისთვისაც, რაც მამუკამ და ალეკომ გააკეთეს, რომ ახლა პირადი წყენების, წარსულში კამათების განხილვის დრო არ არის. ახლა ჩვენ უნდა გადავარჩინოთ ჩვენი ქვეყანა, ჩვენი სახელმწიფო, ჩვენი საზოგადოება უნდა გავაერთიანოთ გაერთიანების მაგალითებით.

მამუკასა და ალეკოს ხელის ჩამორთმევა არის საუცხოო მაგალითი იმისა, რომ წარსულში მწვავე კამათის მიუხედავად, დღეს ჩვენ ერთად ვფიქრობთ, როგორ გამოვიყვანოთ ქვეყანა იმ მძიმე კრიზისიდან, სადაც ის „ქართულმა ოცნებამ“ შეიყვანა“, - ასე შეაფასა ელისაშვილთან გაერთიანება „ლელოს“ პოლიტსაბჭოს მდივანმა, ბადრი ჯაფარიძემ.

17 ივლისს ცნობილი გახდა, რომ „ლელო“, ანა დოლიძის პარტია და მოძრაობა „თავისუფლების მოედანი“ 26 ოქტომბრის საპარლამენტო არჩევნებში ერთიანი სიით მიიღებენ მონაწილეობას.

საპარლამენტო არჩევნებისთვის ცალკე პოლიტიკური პლატფორმა - „ერთიანობა“ შექმნეს „ერთიანმა ნაციონალურმა მოძრაობამ“ და „სტრატეგია აღმაშენებელმა“. მათ პოლიტოლოგი გია ჯაფარიძე, ისტორიკოსი ლაშა ბაქრაძე და პარლამენტის დამოუკიდებელი დეპუტატები - არმაზ ახვლედიანი და თამარ კორძაია შეუერთდნენ. არჩევნებისთვის გაერთიანდნენ პარტიები „ახალი“, „დროა“ და „გირჩი - მეტი თავისუფლებისთვის“.