Ալեկո Էլիսաշվիլին միացել է «Լելոյի», Անա Դոլիձեի և «Ազատության հրապարակի» դաշինքին

«Ժամանակն է վեր կանգնել վրդովմունքներից, հաշտվել, միավորվել և հաղթել»,- այս վերնագրով Ալեկո Էլիսաշվիլին Facebook-ում լուսանկար է հրապարակել «Լելոյի» նախագահ Մամուկա Խազարաձեի հետ։

Նախկինում Ալեկո Էլիսաշվիլին և Մամուկա Խազարաձեն բազմիցս քննադատել են միմյանց։ Էլիսաշվիլին «Լելոյի» հիմնադիրներին անվանել է «բանկիրներ» և «ժողովրդին քամողներ»։

«Այն, ինչ արել են Մամուկան և Ալեկոն, լավ օրինակ է մյուսների համար, որ այժմ ժամանակը չէ քննարկելու անձնական վրդովմունքներն ու անցյալի վեճերը: Հիմա մենք պետք է փրկենք մեր երկիրը, մեր պետությունը, պետք է մեր հասարակությանը համախմբենք միասնականության օրինակներով։

Մամուկայի և Ալեկոյի ձեռքսեղմումը հիանալի օրինակ է այն բանի, որ չնայած նախկինում բուռն վեճերին, այսօր մենք միասին մտածում ենք, թե ինչպես կարելի է երկիրը դուրս բերել այն ծանր ճգնաժամից, որին հասցրել է «Վրացական երազանքը»,- այսպես է գնահատել «Լելոյի» քաղխորհրդի քարտուղար Բադրի Ջափարիձեն Էլիսաշվիլիի հետ միությունը:

Հուլիսի 17-ին հայտնի դարձավ, որ «Լելոն», Աննա Դոլիձեի կուսակցությունը և «Ազատության հրապարակ» շարժումը հոկտեմբերի 26-ին կայանալիք խորհրդարանական ընտրություններին մասնակցելու են միասնական ցուցակով։

Խորհրդարանական ընտրությունների համար առանձին քաղաքական հարթակ՝ «Միասնություն» են ստեղծել «Միացյալ ազգային շարժումը» և «Ստրատեգիա Աղմաշենեբելին»։ Նրանց են միացել քաղաքագետ Գիա Ջափարիձեն, պատմաբան Լաշա Բաքրաձեն և անկախ պատգամավորներ Արմազ Ախվլեդիանին և Թամար Կորձաիան: Ընտրությունների համար միավորվել են «Ախալի», «Դրոա» և «Գիրչի՝ ավելի շատ ազատություն» կուսակցությունները։