„ამერიკის ხმის“ ინფორმაციით, ბაიდენის მიღებაზე კობახიძეს მიწვევა გაუუქმეს

გარდა ამისა, როგორც „ამერიკის ხმა“ იუწყება, ადმინისტრაციამ უარი თქვა საქართველოს დელეგაციასთან ყველა შეხვედრაზე და პრემიერ-მინისტრ კობახიძესთან შეხვედრაზე ასევე უარი თქვა ჯეიკ სალივანმა, თეთრი სახლის ეროვნული უსაფრთხოების მრჩეველმა.

„ამერიკის ხმისთვის“ ცნობით, ამ გადაწყვეტილებების მიზეზი საქართველოს მთავრობის ანტიდემოკრატიული ქცევა და რიგი ნაბიჯებია, მათ შორის, ე.წ. უცხოეთის აგენტების შესახებ კანონის მიღება, ანტიკორუფციული ბიუროს მიერ არასამთავრობო ორგანიზაციების - „საერთაშორისო გამჭვირვალობა - საქართველოსა“ და „აირჩიე ევროპას“ წინააღმდეგ გადადგმული ნაბიჯი, ასევე მმართველი ძალის მიერ, ოპოზიციური პარტიების აკრძალვის შესახებ გაკეთებული განცხადებები.

როგორც „ამერიკის ხმა“ წერს, ბაიდენის ადმინისტრაციას საქართველოს მთავრობის ნაბიჯები არწმუნებს, რომ მას გადაწყვეტილი აქვს საქართველოს ევროატლანტიკური ინტეგრაციისა და ქართველი ხალხის ნების უგულებელყოფა.

პრეზიდენტ ბაიდენის ადმინისტრაციის ამ გადაწყვეტილებებს ჯერ არ გამოხმაურებია საქართველოს მთავრობის ადმინისტრაცია. კომენტარი არც „ქართულ ოცნებაში“ გაკეთებულა.

საქართველოს პრემიერ-მინისტრი ირაკლი კობახიძე 25 სექტემბერს გაეროს გენერალური ასამბლეის 79-ე სესიაზე სიტყვით გამოვა. მანამდე მან მონაწილეობა მიიღო „მომავლის სამიტში“ და დაესწრო გენერალური დებატების გახსნას, სადაც სესიის მონაწილეებს აშშ-ის პრეზიდენტმა ჯოზეფ ბაიდენმაც მიმართა. მთავრობის ადმინისტრაციის მიერ გავრცელებულ განცხადებაში ნათქვამი იყო, რომ ირაკლი კობახიძე ჯო ბაიდენისა და მისი მეუღლის სახელით გამართულ ოფიციალურ მიღებასაც დაესწრებოდა.

„ქართულ ოცნებასა“ და ამერიკის შეერთებულ შტატებს შორის ურთიერთობა მკვეთრად გაუარესდა მას შემდეგ, რაც საქართველოს მმართველმა პარტიამ სამოქალაქო საზოგადოებისა და დამოუკიდებელი მედიის შემზღუდავი ე.წ. „უცხოეთის აგენტების“ შესახებ რუსული კანონი მიიღო, რამაც საქართველოს ევროკავშირში გაწევრიანების პროცესი შეაჩერა. მაისის ბოლოს აშშ-მა საქართველოსთან თანამშრომლობის „ყოვლისმომცველ გადახედვა“ დაიწყო და სავიზო შეზღუდვის ახალი პოლიტიკა შემოიღო. მას შემდეგ, სავიზო სანქციები დაუწესდა საქართველოს 90-ზე მეტ მოქალაქეს, მათ შორის, რუსული კანონის მხარდამჭერ დეპუტატებსა და დეზინფორმაციის გავრცელებაში ჩართულ პირებს. გარდა ამისა, ხაზინის დეპარტამენტმა დაასანქცირა და „მაგნიტსკის სიაში“ შეიყვანა ხელისუფლების ორი მოქმედი მაღალჩინოსანი, ასევე პრორუსული, ძალადობრივი ჯგუფის „ალტ-ინფოს“ ორი ლიდერი. „ამერიკის ხმის“ ინფორმაციით, აშშ-ს შემუშავებული აქვს სანქციები „ქართული ოცნების“ საპატიო თავმჯდომარისა და საქართველოს ყოფილი პრემიერ-მინისტრის, ბიძინა ივანიშვილის წინააღმდეგაც.