არალეგიტიმურმა პარლამენტმა მანდატი შეუწყვიტა ივანიშვილს და „ოცნების“ კიდევ 7 წევრს

დღევანდელ სხდომაზე დეპუტატის უფლებამოსილება შუწყდათ „ქართული ოცნების“ იმ წევრებსაც, რომლებმაც არალეგიტიმურ მთავრობაში დაიკავეს თანამდებობები - პრემიერ-მინისტრ ირკლი კობახიძეს, საგარეო საქმეთა მინისტრ მაკა ბოჭორიშვილს, გარემოს დაცვისა და სოფლის მეურნეობის მინისტრ დავით სონღულაშვილს, იუსტიციის მინისტრ ანრი ოხანაშვილსა და ეკონომიკის მინისტრის მოადგილე მარიამ ქვრივიშვილს.

„ქართულ ოცნებას“ დღეს არ უმსჯელია ოპოზიციის იმ წევრებისთვის უფლებამოსილების ვადამდე შეწყვეტაზე, რომლებმაც პარლამენტს შესაბამისი განცხადებით მიმართეს. „ქართული ოცნება“ საშემოდგომო სესიის დასრულებას პარასკევს გეგმავს.

25 ნოემბერს, „ქართულმა ოცნებამ“ მე-11 მოწვევის პარლამენტის პირველი სხდომა ჩაატარა და 150-ვე წევრის უფლებამოსილება ცნო იმის მიუხედავად, რომ მათი არჩევის კანონიერება საკონსტიტუციო სასამართლოში იყო გასაჩივრებული. 28 ნოემბერს არალეგიტიმურმა პარლამენტმა მთავრობაც დაამტკიცა.

ცენტრალური საარჩევნო კომისიის საბოლოო მონაცემებს, რომლის თანახმადაც „ქართულმა ოცნებამ“ პარლამენტში 89, „კოალიციამ ცვლილებისთვის“ - 19, „ერთიანობა - ნაციონალურმა მოძრაობამ“ - 16, „ძლიერმა საქართველომ“ - 14, ხოლო პარტიამ „გახარია საქართველოსთვის“ - 12 მანდატი მიიღო, არცერთი ოპოზიციური პარტია არ აღიარებს. ისინი მიიჩნევენ, რომ არჩევნები გაყალბდა და ახალი საპარლამენტო არჩევნების ჩატარებას ითხოვენ.