ბორელი: საქართველოს დიდი ცვლილებები სჭირდება, რომ EU-ის კანდიდატად დარჩეს

ბორელმა ეს განცხადება კიევში გააკეთა, სადაც ინტერვიუ გამოცემა „უკრაინსკა პრავდას“ მისცა.

„მე ვერ ვხედავ მსგავსებას საქართველოსა და უკრაინას შორის, სრულებით ვერა. უკრაინის პრეზიდენტი და მთავრობა სრულად არიან ჩართული ევროკავშირში გაწევრიანებაში, ისევე როგორც უკრაინული საზოგადოება. ეჭვგარეშეა, რომ თქვენს ქვეყანას სურს გახდეს ევროკავშირის წევრი. ევროკავშირის წევრობა არის ყველაზე ძლიერი უსაფრთხოების ვალდებულება ან უსაფრთხოების გარანტია, რომელიც შეგვიძლია უკრაინას შევთავაზოთ.

საქართველოს შემთხვევაში, რა თქმა უნდა, ეს ასე არ არის. ჩვენ ვეუბნებოდით საქართველოს მმართველებს, საქართველოს მთავრობას, რომ ისინი შორდებიან ევროპულ გზას და თუ მათ სურთ გახდნენ ევროკავშირის წევრი, უნდა შეცვალონ მათ მიერ დამტკიცებული კანონი, მოაგვარონ არჩევნებზე გამოვლენილი პრობლემები, დაუბრუნდნენ გზას. მათ დიდი ცვლილებები სჭირდებათ, რომ ისევ ევროკავშირის წევრობის კანდიდატად განიხილებოდნენ“, - თქვა ბორელმა, რომელიც ევროკომისიის ვიცე-პრეზიდენტიც არის.

30 ოქტომბერს, ევროკომისიამ ყოველწლიური გაფართოების პაკეტი გამოაქვეყნა, რომელიც ევროკავშირში გაწევრიანების გზაზე ათი ქვეყნის, მათ შორის, საქართველოს პროგრესს აფასებს. ევროკომისია აცხადებს, რომ საქართველოს გაწევრიანების პროცესი, მისი მთავრობის ქმედებების გამო, დე ფაქტო შეჩერებულია და არ გაუწევს რეკომენდაციას საქართველოსთან გაწევრიანებიაზე მოლაპარაკებების დაწყებას, თუ ქვეყანა კურსს არ შეიცვლის. მმართველი პარტია „ქართული ოცნება“ ამ მოცემულობას უარყოფს.