ირაკლი კობახიძის განცხადებას იტალიაც უარყოფს და განმარტავს, რომ სანქციებს მხარი დაუჭირა

საგარეო საქმეთა სამინსიტროს განცხადებაში ნათქვამია, რომ იტალიამ საბჭოზე მტკიცედ დაგმო საქართველოში ბოლო კვირების განმავლობაში მომხდარი ძალადობა და მხარი დაუჭირა კაია კალასის მიერ შეთავაზებულ ზომებს, მათ შორის სანქციებს, რომლებიც „დაიბლოკა სხვა წევრი სახელმწიფოების მხრიდან კონსენსუსის არ არსებობის გამო“.

„ჩვენი ქვეყანა ასევე შეუერთდა კონსენსუსს წინადადებაზე, შეჩერდეს დიპლომატიური ვიზების გამარტივებული წესით გაცემის შესახებ შეთანხმება, რაც მიღებული იქნა.

დაბოლოს, იტალიამ კიდევ ერთხელ დაადასტურა, რომ ევროკავშირი უნდა დარჩეს ქართველი ხალხის გვერდით და გამოთქვა იმედი, რომ თბილისის ბოლოდროინდელი გადაწყვეტილებები, რამაც, საბოლოო ჯამში, ფაქტობრივად შეაჩერა მისი ევროპული გზა, შეიძლება გადაიხედოს“, - ნათქვამია იტალიის საგარეო საქმეთა სამინისტროს განცხადებაში.

16 დეკემბერს, ევროკავშირის საგარეო საქმეთა საბჭომ საქართველოში ბოლო დროს განვითარებულ მოვლენებზე იმსჯელა და დიპლომატიური პასპორტის მფლობელთათვის უვიზო რეჟიმის შეჩერების აუცილებლობაზე შეთანხმდა. ევროკომისია ამ წინადადებას წელსვე წარადგენს.

საბჭომ ინდივიდუალური სანქციების დაწესებაც განიხილა, თუმცა, როგორც კაია კალასმა, საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა განაცხადა, რომ ამ საკითხზე 27 ქვეყნის თანხმობაა საჭირო.

საგარეო საქმეთა საბჭოს სხდომის დასრულების შემდეგ უნგრეთის საგარეო საქმეთა მინისტრმა, პიტერ სიიარტომ თქვა, რომ სლოვაკ ოფიციალურ პარტნიორთან ერთად, ვეტო დაადო საქართველოს პოლიციის ზოგიერთი მაღალჩინოსნის დასანქცირებას.

საქართველოს არალეგიტიმურმა პრემიერ-მინისტრმა 17 დეკემბერს, მთავრობის ადმინისტრაციაში გამართულ ბრიფინგზე ევროკავშირის ხუთ ქვეყანას - უნგრეთს, სლოვაკეთს, იტალიას, ესპანეთსა და რუმინეთს - მადლობა გადაუხადა საგარეო საქმეთა საბჭოზე „ქართველი ხალხის მხარდამჭერი პოზიციის“ დაფიქსირებისთვის. კობახიძის თქმით, საქართველოს ხელისუფლებისთვის საჯაროდ გახდა ცნობილი ხუთი ქვეყნის თაობაზე, თუმცა ფიქრობს, რომ „იმ ქვეყნების ჩამონათვალი, რომლებიც სანქციების წინააღმდეგ წავიდნენ, კიდევ უფრო ფართოა“.