კრიმინალურმა პოლიციამ ე.წ. „უცხოეთის აგენტების“ შესახებ რუსული კანონის საწინააღმდეგო აქციაზე, პარლამენტთან დროებით განთავსებული რკინის ჯებირის ჯგუფურად დაზიანების ბრალდებით, ორი პირი, 19 და 23 წლის მამაკაცები დააკავა. დანაშაულის დამტკიცების შემთხვევაში, მათ 3-დან 6 წლამდე თავისუფლების აღკვეთა ემუქრებათ.
ახალი ამბები
მკითხველის რჩეული
- 1 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 2 უილსონი: თუ ივანიშვილი 29 დეკემბრის გეგმას განახორციელებს, წარმოუდგენელ პასუხს უნდა ელოდეს
- 3 ბალტიის ზღვაში კაბელის დაზიანებაში ეჭვმიტანილი გემის კაპიტანი საქართველოს მოქალაქეა
- 4 რას ამბობს გდდ-ის ყოფილი მაღალჩინოსანი საქართველოდან გამგზავრებამდე მიცემულ ინტერვიუში
- 5 დაძაბულობაა ბოლნისში, სადაც ავტოავარიას ორი არასრულწლოვანი ემსხვერპლა
- 6 მოხელის შეფასება 6 თვეში ერთხელ და ხელფასის 20%-ის დაკავება - რა ცვლილებები მიიღო „ოცნებამ“
შინაგან საქმეთა სამინისტროს განცხადებით, გამოძიებით დადგინდა, რომ 14 მაისს, პარლამენტის შენობის მიმდებარე ტერიტორიაზე მიმდინარე საპროტესტო აქციის დროს ს.მ.-მ და ო.ო.-მ სხვა პირებთან ერთად, როგორც ფიზიკური ძალის, ასევე, რკინის ნივთის გამოყენებით პარლამენტის შესასვლელთან განთავსებული რკინის დამცავი ჯებირი მიზანმიმართულად დააზიანეს.
„დანაშაულში მონაწილე სხვა პირების დადგენა-დაკავების მიზნით საგამოძიებო მოქმედებები გრძელდება. გამოძიება სისხლის სამართლის კოდექსის 187-ე მუხლის მე-2 ნაწილის „გ“ ქვეპუნქტით მიმდინარეობს, რაც ჯგუფურად ნივთის დაზიანებას გულისხმობს“, - აცხადებენ შსს-ში.
გუშინ, 15 მაისს, პოლიციამ სარეკლამო კომპანია „ლიმონის“ დირექტორი, გიორგი ოკმელაშვილი სამსახურებრივი საქმიანობის შესრულების დროს პოლიციელზე თავდასხმის ბრალდებით დააკავა. დანაშაული 4-დან 7 წლამდე პატიმრობით ისჯება.
სისხლის სამართლის წესით, პოლიციელზე თავდასხმისა და ნივთის დაზიანების მუხლებით, კიდევ 6 ადამიანია დაკავებული.
ერთი თვეა, რუსული კანონის წინააღმდეგ, თბილისში, მრავალათასიანი დემონსტრაციები იმართება. სპეცრაზმმა და პოლიციამ მშვიდობიანი მომიტინგეები არაერთხელ დაარბია. ამ ხნის განმავლობაში ადმინისტრაციული წესით დააკავეს აქციების ასზე მეტი მონაწილე. შინაგან საქმეთა სამინისტროს წარმომადგენლებმა სასტიკად ცემეს მომიტინგე დეპუტატები ალექსანდრე ელისაშვილი და ლევან ხაბეიშვილი, სამოქალაქო აქტივისტი დავით ქაცარავა და სხვები. უცნობი პირები, რომლებიც ამ დრომდე არ დაუკავებიათ, თავს დაესხნენ რუსული კანონის საწინააღმდეგო აქციების არაერთ მონაწილეს და სხეულის მრავლობითი დაზიანებები მიაყენეს. პროკურატურას ძალადობის არცერთი ფაქტი არ აქვს გამოძიებული და არავინ არის მიცემული სისხლის სამართლის პასუხისგებაში.
„ქართულმა ოცნებამ“ რუსული კანონი 84 ხმით 30-ის წინააღმდეგ, 14 მაისს, მესამე და საბოლოო მოსმენით მიიღო. პრეზიდენტმა სალომე ზურაბიშვილმა თქვა, რომ რუსულ კანონს ვეტოს დაადებს. ამისათვის პრეზიდენტს ორკვირიანი ვადა აქვს, 28 მაისამდე. „ქართულ ოცნებას“ პრეზიდენტის ვეტოს დაძლევა შეუძლია.
