საქართველოს მოქალაქეებს უნგრეთში დასაქმება გამარტივებული წესით შეეძლებათ

უნგრეთის მთავრობას დეფიციტური პროფესიების სიაში 150-მდე პროფესია აქვს შეტანილი, მათ შორისაა,  მძღოლი, მშენებელი, ბანკის მოლარე-ოპერატორი, მექანიკოსი, ელექტრიკოსი, შემდუღებელი, IT სპეციალისტი, მზარეული, მიმტანი, მედდა, მასაჟისტი, სოციალური მუშაკი, საკუთრების მცველი, კვების მრეწველობის, სოფლის მეურნეობის სპეციალისტი, ოფისის ადმინისტრატორი, მენეჯერი და სხვა.

უნგრეთში 3 თვიდან 5 წლამდე ვადით ლეგალურად დასაქმებას საქართველოს ის მოქალაქეები შეძლებენ, რომლებსაც დეფიციტური პროფესიის დამადასტურებელი დოკუმენტი აქვთ და უნგრელი დამსაქმებლების მოთხოვნებს დააკმაყოფილებენ. ანაზღაურებას დამსაქმებლები განსაზღვრავენ და შრომით ურთიერთობებს ხელშეკრულებით დაარეგულირებენ.

„მადლობას ვუხდი უნგრელ პარტნიორებს მზადყოფნისთვის, რომ საქართველო შეტანილ იქნას იმ ქვეყნების სიაში, რომლებიც სარგებლობენ აღნიშნული გამარტივებული პროცედურებით. ეს ფაქტი ჩვენი ქვეყნისადმი უნგრეთის ურყევი მხარდაჭერის კიდევ ერთი ნათელი დადასტურებაა“ - განაცხადა საქართველოს საგარეო საქმეთა მინისტრმა ილია დარჩიაშვილმა, უნგრელ კოლეგასთან გამართული შეხვედრის შემდეგ.

ორი ქვეყნის საგარეო საქმეთა მინისტრებმა შეხვედრაზე ტურიზმის მიმართულებით თანამშრომლობის გაღრმავებაზეც ისაუბრეს. ამ კონტექსტში აღინიშნა ავიაკომპანია Wizz Air -ის  მიერ ქუთაისის აეროპორტიდან რეისების რაოდენობის გაზრდის მნიშვნელობა.

უნგრეთი ევროკავშირისა და ნატოს წევრია. უნგრეთს ჩრდილოეთით სლოვაკეთი, აღმოსავლეთით - უკრაინა და რუმინეთი, სამხრეთით - სერბეთი და ხორვატია, სამხრეთ-დასავლეთით - სლოვენია, ხოლო დასავლეთით ავსტრია ესაზღვრება. ქვეყნის დედაქალაქია ბუდაპეშტი, ოფიციალური ენა უნგრულია, ეროვნული ვალუტა კი ფორინტი. 1 ფორინტი 0.0071 ლარი ღირს.

უნგრეთი განვითარებული ინდუსტრიულ-აგრარული ქვეყანაა ინტენსიური სოფლის მეურნეობით. საშუალო ჯამური ხელფასი 1027 ევროა.