საქართველოში არ შემოუშვეს რუსეთში „აგენტად“ გამოცხადებული ვიქტორ შენდეროვიჩი

შენდეროვიჩი თბილისში თელ-ავივიდან პირველ ივნისს ჩამოფრინდა, თუმცა მესაზღვრეებმა მიზეზის განმარტების გარეშე უკან გააბრუნეს. 2 და 4 ივნისს, თბილისსა და ბათუმში მისი მონაწილეობით ღონისძიებები უნდა გამართულიყო.

„დღესასწაული საქართველოს შინაგან საქმეთა სამინისტროს ანონიმურმა ჯგუფმა ახსნა-განმარტების გარეშე გააუქმა. საქართველო ჩემგან დაიცვეს, ყოჩაღ.

არ გავრისკავ და ივანიშვილის საქართველოს პუტინის პროვინციას არ ვუწოდებ, მაგრამ ამ მიმართულებით მიდის მუშაობა, ასე არაა?

2006 წელს, სამარცხვინო ანტიქართული კამპანიისა და დეპორტაციის დროს, მე, ასობით სხვა მოსკოველთან ერთად, პუშკინის მოედანზე საპროტესტო აქციაზე მივედი მკერდზე ნიშნით - „მე ვარ ქართველი“... როგორც უკვე ჩემი დეპორტაციიდან (თბილისიდან) ირკვევა, მაინც არასაკმარისად ქართველი ვარ. სასაცილოა“, - წერს ვიქტორ შენდეროვიჩი სოციალურ ქსელში.

ვიქტორ შენდეროვიჩმა რუსეთი 2022 წლის იანვარში დატოვა. ამას წინ უსწრებდა სისხლის სამართლის საქმე, რომელიც მის წინააღმდეგ პუტინთან დაახლოებული ბიზნესმენის და „ვაგნერის ჯგუფის“ დამფუძნებლის, ევგენი პრიგოჟინის შესახებ გაკეთებული განცხადების გამო აღძრეს.

შენდეროვიჩმა რადიო „ეხო მოსკვის“ ეთერში პრიგოჟინს სისხლის სამართლის დამნაშავე და მკვლელი უწოდა, რის შემდეგაც პრიგოჟინმა სასამართლოში უჩივლა მისი პატივისა და ღირსების შელახვის გამო. 2021 წლის დეკემბერში, სანქტ-პეტერბურგის სასამართლომ შენდეროვიჩის განცხადებები ცილისმწამებლურად მიიჩნია - რადიოს პრიგოჟინის სასარგებლოდ კომპენსაციის სახით მილიონი რუბლის, ხოლო შენდეროვიჩს 100 000-ის გადახდა დაეკისრა.

სასამართლოს გადაწყვეტილების საფუძველზე ევგენი პრიგოჟინმა მწერლის წინააღმდეგ, ცილისწამების მუხლით, სისხლის სამართლის საქმის აღძვრა მოითხოვა. ვიქტორ შენდეროვიჩის განცხადებით, მან რუსეთი ანგარიშსწორების საფრთხის გამო დატოვა. მოგვიანებით სასამართლომ გადაწყვეტილებას გადახედა და შენდეროვიჩისთვის დაკისრებული თანხა 1.5 მილიონ რუბლამდე გაზარდა.