თურქეთსა და სირიაში 6 თებერვალს მომხდარი მიწისძვრების შედეგად დაღუპულთა რაოდენობამ 37 000-ს გადააჭარბა. ოფიციალური მონაცემებით, თურქეთის მხარეს დაღუპულია სულ მცირე 31 974 ადამიანი, ხოლო სირიის ტერიტორიაზე - 5814.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
თურქეთის სამხრეთ-აღმოსავლეთ ნაწილიდან, სადაც ათი პროვინცია დაზარალდა, 195 962 ადამიანის ევაკუაცია განხორციელდა. 81 000 დაშავებული საავადმყოფოებშია გადაყვანილი. მაშველებმა ნანგრევებიდან 8000-ზე მეტი ადამიანის ამოყვანა შეძლეს.
„მინდა, მადლობა გადავუხადო ყველა მეგობარ და მოძმე ქვეყანას, რომლებიც დღედაღამ აგროვებენ დახმარებას ჩვენი ერისთვის, თავიანთი ჯგუფებით გვეხმარებიან სამძებრო-სამაშველო სამუშაოებში და ლოცვებში არ გვივიწყებენ. თურქეთი, რომელიც ერთ-ერთი უდიდესი სტიქიური უბედურების წინაშე დგას არა მხოლოდ თავის, არამედ კაცობრიობის ისტორიაში, არასოდეს დაივიწყებს მეგობრობას, რომელიც თქვენ აჩვენეთ ამ ძნელ დღეებში“, - განაცხადა თურქეთის პრეზიდენტმა, რეჯეფ თაიფ ერდოღანმა.
თურქეთის ხელისუფლებამ ათასობით შენობის ნგრევასთან დაკავშირებით სამშენებლო კომპანიების ხელმძღვანელების, ინჟინრებისა და არქიტექტორების დაკავება დაიწყო. ვიცე-პრეზიდენტ ფუატ ოქტაის თქმით, იდენტიფიცირებულია 131 ეჭვმიტანილი.
„მათგან 113-ზე დაკავების ორდერია გამოცემული. ჩვენ ამას ზედმიწევნით მივყვებით, ვიდრე სასამართლო პროცესი არ დასრულდება, განსაკუთრებით შენობებზე, რომლებიც ძალიან დაზიანდა და შენობებზე, რომლებმაც სიკვდილი გამოიწვია“, - განაცხადა ვიცე-პრეზიდენტმა.
მედიის ინფორმაციით, ამ დროისთვის 12 ადამიანია დაკავებული. მათ შორის არიან ცნობილი დეველოპერები, რომელთა მიერ აშენებული მაღალსართულიანი კორპუსები გაზიანთეფში, ადანაში, ადიამანსა და ჰატაის პროვინციებში დაინგრა. Times-ის ინფორმაციით, ორი კონტრაქტორი სტამბოლის აეროპორტში დააკავეს იმ დროს, როდესაც საქართველოში გამგზავრებას აპირებდნენ.
ჯანდაცვის მსოფლიო ორგანიზაციის დირექტორმა ევროპაში, ჰანს კლუგემ, 6 თებერვლის მიწისძვრებს ბოლო 100 წლის განმავლობაში რეგიონში მომხდარი „ყველაზე საშინელი ბუნებრივი კატასტროფა“ უწოდა.
გაეროს შეფასებით, მიწისძვრის შედეგად დაღუპულთა საბოლოო რიცხვი სავარაუდოდ გაორმაგდება. ორგანიზაცია აცხადებს, რომ 800 000-ზე მეტი ადამიანი სრულფასოვანი კვების გარეშეა დარჩენილი. სურსათის მარაგი იწურება როგორც თურქეთში, ისე სირიაში. მიმდინარე კვირაში ორივე ქვეყანაში ჰაერის დაბალი ტემპერატურაა მოსალოდნელი, რაც დამატებით სირთულეებს შეუქმნის როგორც მაშველებს, ისე მიწისძვრის გამო უსახლკაროდ დარჩენილ ადამიანებს.
თურქეთის სამხრეთ-აღმოსავლეთ ნაწილში, ქაჰრამანმარაშის პროვინციაში, პირველი, 7.7 მაგნიტუდის სიმძლავრის მიწისძვრა 6 თებერვალს, გამთენიისას, 4:17 საათზე მოხდა. იმავე დღეს მას 7.6 მაგნიტუდა სიმძლავრის ბიძგები მოჰყვა. რეგიონში სულ 2724 ე.წ. აფთერშოკი დაფიქსირდა.
