უკრაინის პრეზიდენტმა, ვოლოდიმირ ზელენსკიმ განაცხადა, რომ უკვე შეათანხმა ახალი კანონპროექტის ტექსტი, რომელმაც ანტიკორუფციული ორგანოების დამოუკიდებლობა უნდა გააძლიეროს და რომ მას უმაღლეს რადაში დღეს, 24 ივლისს შეიტანს.
ახალი ამბები
მკითხველის რჩეული
- 1 „რეპრესიები რეორგანიზაციის სახელით“ - თელავის უნივერსიტეტიდან 5 პროფესორი გაათავისუფლეს
- 2 რიჟვაძის საქმეზე საზღვაო ტრანსპორტის სააგენტოს დირექტორი ალექსი ახვლედიანი დააკავეს
- 3 პაპუაშვილი არჩევნებზე წალენჯიხის მერიის განცხადებას „საბოტაჟს“ უწოდებს
- 4 ნათესავებმა თბილისში იპოვეს ჩეჩნეთიდან ოჯახში ძალადობას გამოქცეული ქალი და მისი წაყვანა სცადეს
- 5 ახობაძის ადვოკატი: ექსპერტმა დაადასტურა, რომ ნარკოტიკის შესაფუთ მასალაზე გადატანილი იყო ნერწყვი
- 6 თეა წულუკიანი ნანუკა ჟორჟოლიანს ცილისწამებისთვის სასამართლოში უჩივის
„ახლახან შევათანხმე კანონპროექტის ტექსტი, რომელიც უზრუნველყოფს უკრაინაში კანონისა და წესრიგის სისტემის რეალურ გაძლიერებას, ანტიკორუფციული სააგენტოების დამოუკიდებლობას, ასევე კანონისა და წესრიგის სისტემის საიმედო დაცვას რუსეთის ნებისმიერი გავლენისა და ჩარევისგან. ტექსტი დაბალანსებულია“, - ციტირებს ზელენსკის განცხადებას გამოცემა „უკრაინსკა პრავდა“.
პრეზიდენტის თქმით, კანონპროექტი მოიცავს „რეალურ ინსტრუმენტებს, არანაირ რუსულ კავშირებს, ეროვნული ანტიკორუფციული ბიუროს და სპეციალიზებული ანტიკორუფციული პროკურატურის დამოუკიდებლობას“.
„მნიშვნელოვანია, რომ შევინარჩუნოთ ერთიანობა. მნიშვნელოვანია, რომ შევინარჩუნოთ დამოუკიდებლობა. მნიშვნელოვანია, რომ პატივი ვცეთ ყველა უკრაინელის პოზიციას და მადლიერები ვიყოთ ყველასი, ვინც უკრაინასთან არის“, - აღნიშნა ზელენკიმ.
ორი დღის წინ, 22 ივლისს, ვოლოდიმირ ზელენსკიმ ხელი მოაწერა უმაღლესი რადას მიერ მიღებულ კანონს, რომლის მიხედვითაც, ეროვნული ანტიკორუფციული ბიურო და სპეციალიზებული ანტიკორუფციული პროკურატურა კარგავენ დამოუკიდებლობას და ფაქტობრივად გენერალური პროკურატურის დაქვემდებარებაში გადადიან.
კანონის მიღებას პროტესტი მოჰყვა. პირველად, სრულმასშტაბიანი ომის დაწყების შემდეგ, მასობრივი ანტისამთავრობო აქციები გაიმართა კიევში, ლვოვში, დნიპროში, ოდესაში და სხვა ქალაქებში.
უკრაინა ევროპელმა პარტნიორებმაც გააკრიტიკეს. გაფართოების საკითხებში ევროკომისარმა, მარტა კოსმა ეროვნული ანტიკორუფციული ბიუროს დამოუკიდებლობის ძირითადი დამცავი მექანიზმების გაუქმება ევროკავშირის გზაზე „სერიოზულ უკან გადადგმულ ნაბიჯად“ შეაფასა.
„მოგიწოდებთ, არ დაუშვათ ეს დიდი შეცდომა, რამაც შეიძლება თქვენი ქვეყანა პროგრესის გზიდან გადაიყვანოს. ანტიკორუფციული ორგანოების დამოუკიდებლობა სასიცოცხლოდ მნიშვნელოვანია. საქმე დეტალებსა და ნიუანსებში კი არა, პოლიტიკოსებისგან დამოუკიდებლობის პრინციპშია - ის ან არსებობს, ან არა“, - მიმართა უკრაინელებს ლიეტუვის საგარეო საქმეთა მინისტრმა, კიასტუსის ბუდრისმა
ზელენსკიმ პირობა დადო, რომ პარლამენტს წარუდგენდა ახალ კანონპროექტს, რომელიც „კანონისა და წესრიგის სისტემის სიმტკიცეს“ უზრუნველყოფდა და შეინარჩუნებდა „ყველა ნორმას ანტიკორუფციული ინსტიტუტების დამოუკიდებლობისთვის“.
