Լրահոս

Իրակլի Կոբախիձեի խոսքով՝ այսպես կոչված լիբերալները առանձնահատուկ խանդավառությամբ են պայքարում քրիստոնեության դեմ և քարոզչությունն օգտագործում են որպես զենք, որը «լրատվության տոտալ վերահսկողության պայմաններում» բոլշևիկների մուրճից մեծ ուժ ունի։

«Այսօր վրաց ուղղափառ եկեղեցին նրանց հարձակման հատուկ թիրախն է»,- ասել է Կոբախիձեն։ Ինչպես նա է նշել, այսպես կոչված լիբերալները պայքարում են նաև «երկրի ինքնության այնպիսի կարևոր հենարանի դեմ, ինչպիսին պետական ​​ինքնիշխանությունն է»։

«Եթե գործընթացներն ընթանային այն ուղղությամբ, որով գնում են մինչ այժմ, ապա պետական ​​ինքնիշխանությունը շուտով պաշտոնապես կհայտարարվի որպես նույն անընդունելի արժեք, ինչ մեզ այսօր հռչակում են երկրի ազգային և կրոնական ինքնությունը։ Վրաստանը հաջողությամբ կարողացել է պաշտպանել թե՛ իր ազգային, թե՛ կրոնական ինքնությունը, թե՛ ավանդական արժեքները։ Այնուամենայնիվ, մենք բախվում ենք նաև ամենադժվար մարտահրավերներին։ Այսպես կոչված լիբերալներն ակտիվորեն փորձում են իրենց գաղափարախոսությունը տարածել վրացական հասարակության մեջ և խարխլել պետության ու հասարակության հիմքերը»,- ասել է Կոբախիձեն։

Վրաստանի վարչապետի խոսքով՝ այս «մարտահրավերներին» ի պատասխան՝ «Վրացական երազանքը» ներկայացրել է սահմանադրական օրենքի նախագիծ, որի նպատակն է «պաշտպանել ընտանեկան արժեքները և անչափահասների շահերը», սակայն իրականում, փոփոխություններն արգելում են դիտարկել ցանկացած հրապարակային կարծիք կամ հանրային հավաք, որը կարող է «խթանել միասեռական հարաբերությունները»: Եվրախորհրդում իշխող կուսակցության այս նախաձեռնությունը գնահատվեց որպես ընտրություններից առաջ ԼԳԲՏԻ ֆոբիայով մանիպուլյացիա և խտրականություն։

Իրակլի Կոբախիձեի խոսքով՝անվերահսկելի միգրացիան ամենամեծ վտանգն է ներկայացնում եվրոպական երկրների ազգային ինքնության համար, և եթե գործընթացները շարունակվեն ներկայիս տեմպերով, ապա շատ շուտով եվրոպական շատ երկրներում տեղի բնակչությունը կլինի փոքրամասնություն։

«Դուք թույլ չեք տվել միգրանտների անվերահսկելի մուտքը Հունգարիա՝ դրանով իսկ պահպանելով երկրի ամուր ազգային ինքնությունը։ Դուք ամուր կանգնած եք Հունգարիայում քրիստոնեության և քրիստոնեական արժեքների պահպանության վրա: Դուք կտրականապես դեմ եք այսպես կոչված ազատական ​​քարոզչությանը՝ թույլ չտալու երեխաներին և երիտասարդներին վնաս հասցնել և նրանց բարոյական արժեքները սասանել։ Դուք հաստատակամորեն պաշտպանում եք Հունգարիայի պետական ​​ինքնիշխանությունը, որն անհրաժեշտ պայման է երկրի ազգային շահերի պաշտպանության և իրացման համար։ Հունգարիան և նրա կառավարությունը, անձամբ վարչապետ Վիկտոր Օրբանը, օրինակելի են բոլորի համար, որոնց համար «հայրենիք և հայրենասիրություն» բառերը հատուկ արժեք ունեն»,- ասել է Կոբախիձեն։

Պահպանողական քաղաքական գործողությունների համաժողովը (CPAC), որը համախմբում է պահպանողական, պոպուլիստ և ծայրահեղ աջ առաջնորդներին ամբողջ աշխարհից, այս տարի Հունգարիայում անցկացվում է երրորդ անգամ: Միջոցառման հիմնական զեկուցողը կրկին երկրի վարչապետ Վիկտոր Օրբանն է։ Օրակարգի համաձայն՝ ապրիլի 25-26-ը կանցկացվեն քննարկումներ՝ «Ինքնիշխանությունը ապրում է, գլոբալիզմը մեռնում է», «Փրկեք արևմուտքը, պաշտպանենք սահմանները» և «Մենք հաղթում ենք, նրանք պարտվում են՝ 2024, ընտրությունների սուպեր տարի» թեմաներով։

Պահպանողականների այս համաժողովում Վրաստանի վարչապետն առաջին անգամ ելույթ է ունեցել 2023 թվականին։ Այն ժամանակվա կառավարության ղեկավար Իրակլի Ղարիբաշվիլիին Եվրամիությունում քննադատում էին Օրբանին աջակցելու և համաժողովում տարածված հոմոֆոբ հաղորդագրությունների համար։ Եվրոպական սոցիալիստների կուսակցությունը (PES) որոշել էր հետ կանչել 2015 թվականին «Վրացական երազանքին» տրված դիտորդ անդամի կարգավիճակը, սակայն մինչ այս հարցի քննարկումը «Վրացական երազանքի» ղեկավարներն իրենք են հայտարարել PES-ից դուրս գալու մասին։