პოლიციამ თბილისში, პარლამენტთან გამართული საპროტესტო აქციის 43 მონაწილე ადმინისტრაციული წესით დააკავა. შინაგან საქმეთა სამინისტრო მათ პოლიციელის მოთხოვნისადმი დაუმორჩილებლობასა და წვრილმან ხულიგნობას ედავება.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 აქციებზე ჟურნალისტებისთვის მუშაობაში უკანონოდ ხელის შეშლის ფაქტებზე გამოძიება დაიწყო
- 6 ბჟანიას ქართველი დეპუტატები აფხაზეთში ფარულად ჩამოჰყავდა - არძინბა
გარდა ამისა, შსს-ს განცხადებით, დაწყებულია გამოძიება სისხლის სამართლის კოდექსის ორი მუხლით - 353-ე პრიმა მუხლი პოლიციელზე ან საჯარო დაწესებულებაზე თავდასხმას გულისხმობს, ხოლო 187-ე მუხლის მეორე ნაწილი ეხება სხვისი ნივთის განადგურებას, ან დაზიანებას ცეცხლის წაკიდებით, აფეთქებით ან სხვა საშიში საშუალებით, არაერთგზის და ჯგუფურად.
შსს-ს მიერ გავრცელებულ განცხადებაში ნათქვამია, რომ აქციის მონაწილეების მხრიდან „კანონსაწინააღმდეგო და ძალადობრივი ქმედებების შედეგად“, უწყების 32 თანამშრომელი დაშავდა.
„დაშავებულების ნაწილს აღენიშნება მძიმე ხარისხის დაზიანებები თავის, თვალის და სხეულის სხვადასხვა მიდამოებში. მათგან 13 პირს ქირურგიული ჩარევა დაჭირდა. ამ დრომდე სამედიცინო დაწესებულებაში რჩება ერთი სამართალდამცველი“, - აცხადებს შსს.
სპეცრაზმმა მშვიდობიანი საპროტესტო აქციის დარბევა ღამის დაახლოებით 2 საათზე დაიწყო. დემონსტრანტების წინააღმდეგ სპეციალური საშუალებები, მათ შორის, წყლის ჭავლი და ე.წ. წიწაკის სპრეი გამოიყენეს. სახალხო დამცველის შეფასებით, შსს-მ შეკრების თავისუფლება დაარღვია, რადგან იმ დროს, როდესაც სპეციალური საშუალებების გამოყენებით მოქალაქეების დაშლა დაიწყო, აქციას მშვიდობიანი ხასიათი ჰქონდა.
დარბევის დროს სპეცრაზმელები ფიზიკურად გაუსწორდნენ ათობით მოქალაქეს. ისინი მიზანმიმართულად ესხმოდნენ თავს ჟურნალისტებს, რომლებიც პროფესიულ მოვალეობას ასრულებდნენ და ძალადობის გაშუქებას ცდილობდნენ.
შსს აცხადებს, რომ აქციის მონაწილეები არ დაემორჩილნენ პოლიციელთა მითითებებს, მიაყენეს მათ სიტყვიერი შეურაცხყოფა და დაუპირისპირდნენ ფიზიკურად.
„აქციის მონაწილეებმა ღამის განმავლობაში რუსთაველის გამზირზე გაურკვეველ ნივთებს წაუკიდეს ცეცხლი, აღმართეს ბარიკადები, დააზიანეს როგორც თბილისის მუნიციპალიტეტის ასევე კერძო პირთა ქონება, პოლიციის მიმართულებით ისროდნენ შუშის ბოთლებს, ქვებს, რკინის საგნებსა და პიროტექნიკას. აღნიშნული ძალადობრივი ქმედებების აღკვეთის მიზნით, შინაგან საქმეთა სამინისტრომ გასული ღამის განმავლობაში არაერთხელ გამოიყენა კანონით დაშვებული სპეციალური საშუალებები. სპეციალური საშუალებების გამოყენებამდე ადგილზე ხდებოდა შეკრების მონაწილეების წინასწარი გაფრთხილება“, - აცხადებს შსს.
რუსთაველის გამზირზე საპროტესტო აქცია 28 ნოემბრის საღამოს დაიწყო და 29 ნოემბრის დილამდე გაგრძელდა. მოქალაქეებმა და ოპოზიციური პარტიების ლიდერებმა პარლამენტთან შეკრება მას შემდეგ დაიწყეს, რაც არალეგიტიმურმა პრემიერ-მინისტრმა ირაკლი კობახიძემ მოსახლეობას გააცნო „ქართული ოცნების“ გადაწყვეტილება ევროკავშირში გაწევრიანების პროცესის შეჩერების თაობაზე. კობახიძის თქმით, 2028 წლის ბოლომდე დღის წესრიგში არ დააყენებენ გაწევრიანებაზე მოლაპარაკების გახსნის საკითხს და უარს იტყვიან ევროკავშირის საბიუჯეტო გრანტებზე. პრეზიდენტმა სალომე ზურაბიშვილმა აღნიშნული გადაწყვეტილება „საკონსტიტუციო გადატრიალებისთვის“ დასმულ წერტილად შეაფასა და თქვა, რომ არალეგიტიმურმა ხელისუფლებამ საკუთარ ხალხს ომი გამოუცხადა.
