საქართველოს პრეზიდენტი სალომე ზურაბიშვილი დარწმუნებულია, რომ საპარლამენტო არჩევნებში ბარიერგადალახული ოპოზიციური პარტიები პარლამენტში არ შევლენ. ამის შესახებ მან „მთავარ არხთან“ ინტერვიუს დროს განაცხადა.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
„დიდად არ მაინტერესებს, ვინ ჩახსნის [სიებს] ამ ფორმით, იმ ფორმით... შეიძლება გაუგებრობა არის და ახლა ბევრ გაუგებრობას უნდა ველოდოთ, როცა ერთპარტიული სისტემიდან მრავალპარტიულში გადავდივართ. ეს არის დემოკრატია. ჯობია შევეგუოთ. სხვადასხვა ფორმები, სხვადასხვა აზრები, ერთმანეთთან არ შეთანხმება, ზოგჯერ არ გაგება... ის პარტიები რომ არ შევლენ... და მე დარწმუნებული ვარ ერთ რამეში, რომ არ შევლენ“, - განაცხადა ზურაბიშვილმა.
როგორც პრეზიდენტმა აღნიშნა, რომ 2020 წლის საპარლამენტო არჩევნების შემდგომ ვითარებასთან შედარებები „უაზროა“.
„იქ არ იდგა ქვეყნის მომავლის, ევროპული მომავლის საკითხი. პირიქით, ევროპელები ამბობდნენ, რომ შედით პარლამენტში და იქიდან იმუშავეთ რეფორმებზე. არ იყო განცდა საზოგადოებაში, რომ ქვეყანა სხვა მიმართულებით მიდის, არ იყო განცდა, რომ მასიურად გაყალბდა არჩევნები. იყო, როგორც ყოველთვის ის, რასაც მე „ნორმალურ გაყალბებას“ ვეძახი, მაგრამ ის განცდა, რომ მოგვპარეს არჩევნები და ქვეყანა, არ არსებობდა. ამიტომ ძალიან განსხვავებული სიტუაციაა. დღეს ვინც შევა პარლამენტში, შევა რუსეთში
სანამ არ შევა არცერთი ოპოზიციური პარტია, „ოცნება“ რჩება მარტო. დღეს ვართ სულ სხვა მდგომარეობაში. მარტო არიან პარლამენტში, მარტო არიან მთავრობაში. ერთპარტიულია მთავრობა, პარლამენტი, ერთი კაცის ვერტიკალის ქვეშ და ყველა ინსტიტუტი ქვეყანაში, აბსოლუტურად ყველა, სრულად დამოკიდებულია ამ ერთ პარტიაზე და ადამიანზე.
რა თქვა დღეს პაპუაშვილმა, თუ მდინარაძემ - რა მნიშვნელობა აქვს, ერთიდაიგივეა - ისეთი პრეზიდენტი უნდა ავირჩიოთ, რომელიც არ გაგვიცრუებს იმედსო, რომ ჩვენი იქნებაო. ანუ მოთხოვნა პრეზიდენტზე არის ის, რომ იყოს სრულიად დამოკიდებული, როგორიც არის ანტიკორუფციული სააგენტო, პროკურატურა, სუსი, ცენტრალური ბანკი, მარეგულირებელი კომისიები, ანუ აბსოლუტურად მთელი სახელმწიფო გახდა ერთი პარტია და ერთი პარტია ერთი ვერტიკალის ქვეშ. ამას რა ჰქვია? რუსეთი“, - თქვა პრეზიდენტმა.
„ქართული ოცნება“ პარლამენტის პირველ სხდომაზე შეკრებას 25 ნოემბერს, ორშაბათს, გეგმავს.
ცენტრალური საარჩევნო კომისიის შემაჯამებელი ოქმის მიხედვით, საპარლამენტო არჩევნებში „ქართულმა ოცნებამ“ ხმების 53.93% მოიპოვა და საკანონმდებლო ორგანოში 150-დან 89 მანდატი მიიღო. „კოალიციას ცვლილებისთვის“ ხმების 11.03% და 19 მანდატი აქვს, „ერთიანობა - ნაციონალურ მოძრაობას“ - 10.17% და 16 მანდატი, „ძლიერ საქართველოს“ - 8.81% და 14 მანდატი, ხოლო პარტიას „გახარია საქართველოსთვის“ - 7.78% და 12 მანდატი.
ცესკოს საბოლოო მონაცემებს მხოლოდ „ქართული ოცნება“ ეთანხმება, ოპოზიციური პარტიები და პრეზიდენტი კი მიიჩნევენ, რომ არჩევნები გაყალბდა. სალომე ზურაბიშვილი და 34 ოპოზიციონერი დეპუტატი არჩევნების შედეგების არაკონსტიტუციურად ცნობას ითხოვენ.
