ძალადობის შესახებ ცნობები ღრმად შემაშფოთებელია - ნატოს გენმდივანი საქართველოზე

„ძალადობის შესახებ ცნობები ღრმად შემაშფოთებელია და მე მათ ცალსახად ვგმობ. მოვუწოდებ მთავრობას, ყველაფერი გააკეთოს მშვიდობისა და სტაბილურობის ხელშეწყობისთვის. ვფიქრობ, ეს ყველა ქართველის ინტერესშია.

ნატო არის ალიანსი, რომელიც დაფუძნებულია დემოკრატიაზე, დაფუძნებულია ღირებულებებზე, დაფუძნებულია თავისუფლების პატივისცემაზე და დემოკრატიაზე, როგორც კონცეფციაზე, ისევე როგორც ყოველდღიურ რეალობაზე. მე მტკიცედ მჯერა, რომ ეს ღირებულებები არის ჩვენი კოლექტიური მშვიდობისა და კეთილდღეობის საფუძველი.

ამჟამად, ვხედავ, რომ ყველა მოკავშირე ცხადყოფს, რომ ნებისმიერი ქმედება, რომელიც ძირს უთხრის დემოკრატიას საქართველოში ან დემოკრატიის შემდგომ განვითარებას, ასევე არის წინსვლას ევროკავშირსა და ნატოში უფრო დიდი ინტეგრაციისკენ, ევროატლანტიკური ინტეგრაციისკენ, ასე ვთქვათ, ისინი საქართველოს მთავრობას მოუწოდებენ, საქართველოს მთავრობას დარჩეს იმ გზაზე, რომელზეც რამდენიმე წლის წინ გადაწყვიტეს აქტიურობა და უკან არ დაიხიოს“, - განაცხადა რუტემ.

28 ნოემბერს, საქართველოს არალეგიტიმურმა პრემიერ-მინისტრმა ირაკლი კობახიძემ განაცხადა, რომ საქართველო 2028 წლის ბოლომდე დღის წესრიგში არ დააყენებს გაწევრიანებაზე მოლაპარაკების გახსნის საკითხს და უარს იტყვის ევროკავშირის საბიუჯეტო გრანტებზე.

საპროტესტო აქციებს, რომელიც „ქართული ოცნების“ გადაწყვეტილებას მოჰყვა, საპოლიციო ძალები სასტიკად არბევენ. მომიტინგეების წინააღმდეგ იყენებენ ცრემლსადენ გაზს, წყლის ჭავლსა და სხვა სპეციალურ საშუალებებს. სავარაუდოდ, გამოყენებული იყო რეზინის ტყვიებიც. 28 ნოემბრის შემდეგ შინაგან საქმეთა სამინისტრომ აქციის 300-ზე მეტი მონაწილე დააკავა, მათი დიდი ნაწილი სპეცრაზმის მიერ არის ნაცემი.