მოსკოვი გააგრძელებს სოხუმის დახმარებას საერთაშორისო კავშირების გაფართოებაში - ზახაროვა

„აფხაზეთის ახალი ხელმძღვანელობის წინაშე დგას მასშტაბური ამოცანები, რათა ეფექტურად უზრუნველყოს რესპუბლიკის ყოველმხრივი განვითარება. ამ პროცესში მნიშვნელოვანი როლი უნდა ითამაშოს მთელი რიგი შესაბამისი რუსულ-აფხაზური შეთანხმებების რეალიზაციამ.

მოსკოვი გააგრძელებს სოხუმისთვის მრავალმხრივი დახმარების აღმოჩენას ეროვნული უსაფრთხოების სფეროში, მწვავე სოციალურ-ეკონომიკური საკითხების გადაჭრასა და საერთაშორისო კავშირების გაფართოებაში“, - განაცხადა ზახაროვამ.

რუსეთის მიერ ოკუპირებულ აფხაზეთში ე.წ. ვადამდელი საპრეზიდენტო არჩევნების მეორე ტური 1-ელ მარტს გაიმართა და გამარჯვებულად კრემლის მიერ მხარდაჭერილი კანდიდატი ბადრა გუნბა გამოცხადდა.

დე ფაქტო ცენტრალური საარჩევნო კომისიის მონაცემებით, გუნბამ, რომელიც ნოემბრიდან ე.წ. პრეზიდენტის მოვალეობას ასრულდებდა, ამომრჩეველთა ხმდების 54.73% მიიღო, ხოლო მისმა კონკურენტმა, ე.წ. ოპოზიციის ლიდერმა, ადგურ არძინბამ - 41.54%.

რუსეთის პრეზიდენტმა ვლადიმერ პუტინმა ბადრა გუნბას მისალოცი დეპეშა გაუგზავნა, რომელშიც იმედი გამოთქვა, რომ რუსეთსა და აფხაზეთს შორის მოკავშირული და მეგობრული ურთიერთობები გაძლიერდება.

აფხაზეთში ვადამდელი საპრეზიდენტო „არჩევნები“ მას შემდეგ დაინიშნა, რაც დე ფაქტო რესპუბლიკის წინა ლიდერი, ასლან ბჟანია გასული წლის ნოემბერში, პროტესტის ფონზე გადადგა. „არჩევნების“ პირველი ტური 15 თებერვალს გაიმართა, რომელშიც გუნბასა და არძინბას გარდა, კიდევ სამი „კანდიდატი“ მონაწილეობდა.