ბოლნისის მუნიციპალიტეტის სოფელ მუშევანში ადგილობრივმა მცხოვრებლებმა კომპანია RMG GOLD-თვის ღია კარიერული წესით ოქროს მოპოვებაზე ნებართვის მიცემა გააპროტესტეს. მოსახლეობა შიშობს, რომ ამ ფორმით ოქროს მოპოვება უარყოფითად იმოქმედებს მათ ჯანმრთელობაზე, სოფელზე, დააბინძურებს მიწას, გარემოს, სარწყავ წყალს.
ახალი ამბები
მკითხველის რჩეული
- 1 სუს-ის ყოფილი უფროსი გრიგოლ ლილუაშვილი რეგიონული განვითარების მინისტრად აღარ დანიშნეს
- 2 ენმ: გენერლები გოგავა და ყურაშვილი რუსულ კომისიაზე პარტიული აფილიაციის გარეშე წარდგებიან
- 3 თბილისის პოლიციის დეპარტამენტის დირექტორად ლაშა გოგნიაშვილი დაინიშნა
- 4 გადაალაგეს, სუს-იც თან გაატანეს არჩევნების გაყალბების ფუნქციით - მეზვრიშვილი ლილუაშვილზე
- 5 რა წერია უცხოური გრანტების წინააღმდეგ „ქართული ოცნების“ კანონპროექტში
- 6 კობახიძე რუსეთის ხსენების გარეშე 9 აპრილზე პასუხისმგებლად „უცხოურ ძალას“ აცხადებს
მუშევანი ბოლნისიდან 14 კილომეტრით არის დაშორებული. სოფელში 1000-მდე ადამიანი ცხოვრობს, ეთნიკური აზერბაიჯანელები. მუშევანში არ არის საბავშვო ბაღი, სასმელი წყალი, ბუნებრივი აირი, მოუწესრიგებელია სოფლის შიდა გზები და სარწყავი სისტემა. კომპანია ადგილობრივებს სწორედ ამ პრობლემების გადაწყვეტას დაჰპირდა და მემორანდუმის გაფორმებაც შესთავაზა, თუმცა მოსახლეობის დიდმა ნაწილმა უარი თქვა.
გარემოზე ზემოქმედების შეფასების დოკუმენტაციის თანახმად, წიაღისეულის მოპოვება მუშევანიდან 808 მეტრში ღია კარიერული წესით მოხდება, რაც მოითხოვს კვირაში 1-2 აფეთქებას, მოპოვებული მადნის ტრანსპორტირება კი დაგეგმილია ყოველდღიურად 24-საათიანი რეჟიმით. ასევე, სოფელთან ახლოს უნდა ააშენონ მასშტაბური დამხმარე ინფრასტრუქტურა, კერძოდ, საწარმოო მოედანი, მომსახურე პერსონალის ოფისი, ტექნიკის ავტოსადგომი, მისასვლელი გზები და სხვა. კარიერის მიმდებარედ განთავსდება 25,7 ჰექტარი ფართობის ფუჭი ქანების სანაყარო.
ამ ეტაპზე დაგეგმილი საქმიანობა გულისხმობს ღია კარიერული წესით ოქროს და სპილენძის მოპოვებას მომდევნო 6 წლის განმავლობაში, თუმცა კომპანიას აქვს შესაძლებლობა, მოითხოვოს როგორც ამ ვადის, ისე, მოპოვების არეალის გაზრდა.
გარემოს ეროვნულმა სააგენტომ, 1-ელ ნოემბერს, მუშევანთან ახლოს ოქროს მოპოვებაზე გარემოსდაცვითი გადაწყვეტილება ჯერ-ჯერობით მხოლოდ 11,27 ჰა ფართობის ტერიტორიაზე გასცა, თუმცა ლიცენზიით განსაზღვრული სამთო მინაკუთვნის საერთო ფართობი 175,8 ჰექტარია. შესწავლის და მარაგების დაზუსტების შემდეგ, კომპანიას უფლება აქვს ახალი ნებართვების გაცემა აღნიშნულ ტერიტორიაზეც მოითხოვოს.
არასამთავრობო ორგანიზაცია „სოციალური სამართლიანობის ცენტრი“, რომელიც მუშევანის მოსახლეობას იურიდიულ საკითხებში ეხმარება, აცხადებს, რომ გარემოს ეროვნულმა სააგენტომ ოქროს მოპოვებაზე ნებართვა კანონით განსაზღვრული პროცედურებისა და მოთხოვნების დარღვევით გასცა; პროცესში ადგილობრივი ეთნიკური უმცირესობის მონაწილეობა სათანადოდ არ იყო უზრუნველყოფილი; სააგენტომ, ასევე, კანონის დარღვევით არ განიხილა და უგულებელყო მათ მიერ წარდგენილი შენიშვნები. სოციალური სამართლიანობის ცენტრი აპირებს ეს გადაწყვეტილება სასამართლოში გაასაჩივროს.
