საქართველოს ხელისუფლებას კიდევ ბევრი აქვს გასაკეთებელი თავისი კურსის დასაცავად - გალუზინი

„ჩვენ ვხედავთ, რომ საქართველოს ხელმძღვანელობის მიერ გატარებული პრაგმატული პოლიტიკა, რომელიც ორიენტირებულია ქვეყნის ეროვნული ინტერესების პატივისცემასა და დაცვაზე, ფაქტიურად იწვევს გულძმარვას ვაშინგტონში, ბრიუსელში და დასავლური ქვეყნების აბსოლუტურ უმრავლესობაში. თუ ვიმსჯელებთ ვაშინგტონსა და ბრიუსელში გაკეთებული კომენტარებიდან, შეიძლება ვივარაუდოთ, რომ საქართველოს ხელმძღვანელობაზე თავდასხმები შესაძლოა გაგრძელდეს. თუ სწორად მესმის, საქართველოს ხელმძღვანელობას ჯერ კიდევ ბევრი აქვს გასაკეთებელი თავისი კურსის დასაცავად“, - თქვა გალუზინმა რუსულ მედიასთან ინტერვიუში.

საქართველოს არალეგიტიმურმა მთავრობამ გადაწყვიტა, 2028 წლის ბოლომდე დღის წესრიგში არ დააყენოს ევროკავშირში გაწევრიანებაზე მოლაპარაკებების გახსნის საკითხი, რასაც ქვეყანაში მრავალათასიანი საპროტესტო აქციები მოჰყვა.

პროტესტის 11 დღის განმავლობაში, საპოლიციო ძალებმა მშვიდობიანი მოქალაქეები, რომლებიც ქვეყნის პროევროპული კურსის ცვლილებას აპროტესტებენ, არაერთხელ დაარბიეს. სპეცრაზმელები ფიზიკურად გაუსწორდნენ როგორც აქციის მონაწილეებს, ისე მედიის წარმომადგენლებს. დაკავებულია 400-ზე მეტი ადამიანი.

აშშ-მა და ევროკავშირის სახელმწიფოების ლიდერებმა ქართველ ხალხს მხარდაჭერა გამოუცხადეს, იმავდროულად დაგმეს აქციის მონაწილეების მიმართ გადამეტებული ძალის გამოყენება.  

რუსეთი, ისევე როგორც „ქართული ოცნების“ ხელისუფლება, საქართველოში განვითარებულ მოვლენებს უკრაინაში 2014 წელს მომხდარ მაიდნის რევოლუციას ადარებს.