31-მა ევროპარლამენტარმა ევროკომისიის ვიცე-პრეზიდენტს, საგარეო პოლიტიკისა და უსაფრთხოების საკითხებში ევროკავშირის უმაღლეს წარმომადგენელს, ჯოზეფ ბორელს წერილით მიმართა. ისინი ითხოვენ, ევროკავშირმა მიიღოს ზომები, მათ შორის, საქართველოს კანდიდატი ქვეყნის სტატუსი შეუჩეროს, რაც ქვეყნის ხელისუფლებისათვის მკაფიო სიგნალი იქნება
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 აქციებზე ჟურნალისტებისთვის მუშაობაში უკანონოდ ხელის შეშლის ფაქტებზე გამოძიება დაიწყო
„საქართველოს ხელისუფლების მუდმივმა არადემოკრატიულმა ქცევამ, განსაკუთრებით მათმა აგრესიულობამ უცხო აგენტების შესახებ „რუსული სტილის“ კანონის გატანის, მშვიდობიანი დემონსტრანტების გაჩუმებისა და ძალის გამოყენების კუთხით, ზღვარი გადალახა. ამგვარმა ქცევამ კიდევ უფრო გაზარდა დაძაბულობა და პოლარიზაცია ქართულ პოლიტიკასა და საზოგადოებაში, რაც ეწინააღმდეგება იმ ცხრა ნაბიჯს, რომელზეც საქართველოს მთავრობამ ვალდებულება აიღო, როდესაც ქვეყანას ევროკავშირის სტატუსი მიენიჭა და ევროკავშირის მიერ ამის უგულვებელყოფა აღარ შეიძლება.
მოგიწოდებთ, დაიკავოთ მტკიცე პოზიცია და მიიღოთ შემდეგი ზომები, რაც მკაფიო სიგნალს გაუგზავნის საქართველოს ხელისუფლებას.
- პირველი - საქართველოს ხელისუფლებისა და წამყვანი პარტიის „ქართული ოცნების“ ქცევა ეწინააღმდეგება ევროკავშირის კანდიდატი ქვეყნის ვალდებულებებს. ამიტომ საქართველოს კანდიდატის სტატუსი უნდა შეჩერდეს გაწევრიანების პროცესში შემდგომი პროგრესის გარეშე.
- მეორე - უნდა გადაიხედოს ევროკავშირის მიერ საქართველოს სახელმწიფო ბიუჯეტისა და სამთავრობო პროგრამების დაფინანსება.
- მესამე, 2023 წლის 8 ნოემბრის კომისიის რეკომენდაციაში მოცემული ცხრა ნაბიჯის განხორციელებაში საქართველოს მიერ მიღწეულ პროგრესთან დაკავშირებით შუალედური შეფასება უნდა მოხდეს შემდგომი შეფერხების გარეშე. ეს ზომა შეტანილია პარლამენტის 2024 წლის 25 აპრილის რეზოლუციაში „საქართველოში უცხოური აგენტების კანონის ხელახალი შემოღების მცდელობისა და სამოქალაქო საზოგადოების შეზღუდვების შესახებ“.
ბოლო წლებში ჩვენ დაუღალავად ვმუშაობდით ქართველი ხალხისა და მისი ევროკავშირში გაწევრიანების მისწრაფების მხარდასაჭერად. ჩვენ სიმტკიცეს ვინარჩუნებთ ამ კუთხით, მაგრამ დემოკრატიული კრიტერიუმები ევროკავშირის ყველა კანდიდატი ქვეყნისთვის ერთი და იგივეა და დაცული უნდა იყოს“, - აღნიშნულია წერილში, რომელსაც ხელს აწერენ პეტრას აუსტრევიჩიუსი, ვიოლა ფონ კრამონი, გაი ვერჰოფშტადტი, რიჰო ტერასი, ტეის როტენი, ოლივიერ შასტელი, ანდრიუს კუბილიუსი, კარენ მელქიორი, მირიამ ლექსმანი, რასა იუკნევიჩიენე, მაიკლ გალერი და სხვები.
ევრპარლამენტარების მიმართვას „ქართული ოცნებიდან“ პარლამენტის ევროპასთან ინტეგრაციის კომიტეტის თავმჯდომარე მაკა ბოჭორიშვილი გამოეხმაურა. მისი თქმით, წერილზე ხელმომწერ ევროპარლამენტარებს შეეძლოთ, ეს მოსაზრებები ევროპარლამენტის რეზოლუციაში დაეფიქსირებინათ.
„არ ვიცი, რა დარჩათ სათქმელი რეზოლუციის მიღმა, თუმცა ეს არის დამატებითი ინსტრუმენტი, რომ ეს ევროპარლამენტარები აქ რამენაირად დაეხმარონ ისევ და ისევ საპროტესტო მუხტს და შექმნან დამატებითი, ახალი ამბავი საქართველოში“, - თქვა ბოჭორიშვილმა.
„ქართული ოცნება“ რუსული კანონის მესამე მოსმენით განხილვასა და მიღებას მომდევნო კვირაში აპირებს. ჯოზეფ ბორელმა არაერთხელ განაცხადა, რომ ეს კანონი შეუთავსებელია ევროკავშირის ღირებულებებთან და მისი მიღება უარყოფითად იმოქმედებს ევროკავშირის გზაზე საქართველოს პროგრესზე.
