თბილისის საქალაქო სასამართლოს მოსამართლე ლელა ცაგარეიშვილმა რუსული კანონის საწინააღმდეგო აქციების მონაწილე გიორგი დუმბაძე სამართალდამრღვევად ცნო და 5000 ლარით დააჯარიმა. 18 წლის აქტივისტს შინაგან საქმეთა სამინისტრო შეკრების ან მანიფესტაციის ჩატარების წესის დარღვევას, კერძოდ, პარლამენტის შენობის წინ გზის გადაკეტვის ორგანიზებას ედავება.
ახალი ამბები
მკითხველის რჩეული
- 1 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 2 უილსონი: თუ ივანიშვილი 29 დეკემბრის გეგმას განახორციელებს, წარმოუდგენელ პასუხს უნდა ელოდეს
- 3 ბალტიის ზღვაში კაბელის დაზიანებაში ეჭვმიტანილი გემის კაპიტანი საქართველოს მოქალაქეა
- 4 რას ამბობს გდდ-ის ყოფილი მაღალჩინოსანი საქართველოდან გამგზავრებამდე მიცემულ ინტერვიუში
- 5 დაძაბულობაა ბოლნისში, სადაც ავტოავარიას ორი არასრულწლოვანი ემსხვერპლა
- 6 მოხელის შეფასება 6 თვეში ერთხელ და ხელფასის 20%-ის დაკავება - რა ცვლილებები მიიღო „ოცნებამ“
ადვოკატ დიმიტრი ნოზაძის თქმით, შსს-მ სასამართლოს მტკიცებულების სახით სატელევიზიო ეთერში გასული ვიდეომასალა წარუდგინა, რითაც არ დგინდება, რომ გზის გადაკეტვის ორგანიზატორი გიორგი დუმბაძე იყო.
„შინაგან საქმეთა სამინისტროს ლოგიკით, ორგანიზება შეიძლება იყოს ის, რომ პირს ხელში ხმის გამაძლიერებელი ეჭიროს. ვერ გაგვცეს პასუხი, რა კრიტერიუმებით დაადგინეს, რაში გამოიხატა ეს. მოსამართლემ არ დააკმაყოფილა შუამდგომლობა და პოლიციელი, რომელმაც ოქმი შეადგინა, სასამართლოში არ მოიყვანა“, - განაცხადა ადვოკატმა.
დემონსტრანტებმა აქციებში მონაწილეობიდან რამდენიმე კვირის შემდეგ გაიგეს, მათ მიმართ ადმინისტრაციული სამართალდარღვევის ოქმები რომ იყო შედგენილი. გიორგი დუმბაძის შემთხვევაში საქმე ეხება რუსული კანონის წინააღმდეგ 24 აპრილს გამართულ მსვლელობას.
„24 აპრილს განვითარებულ მოვლენებზე სასამართლოში ადმინისტრაციული სამართალდარღვევის შესახებ საქმე 15 მაისს შეიტანეს.
ადგილზე პოლიციამ არათუ წინააღმდეგობა არ გაგვიწია, არამედ, პირიქით, გზა გაგვითავისუფლეს, რომ სავალ ნაწილზე გადავსულიყავით. მოსამართლეს ვუთხარი, რომ იქ არავინ იყო ორგანიზატორი, ხალხს არ დასჭირდა მოწოდება იმისათვის, რომ გზის სავალ ნაწილზე გადავსულიყავით. გზის სავალი ნაწილის დაკეტვა პრიორიტეტი არ ყოფილა, არამედ ეს იყო საშუალება, რომ მარშით წავსულიყავით. ისიც ვთქვით, რომ ავტობუსები, სასწრაფო დახმარების და სხვა მანქანები გავატარეთ. ჩვენი მიზანი არ იყო მოქალაქეებისთვის დისკომფორტის შექმნა.
თუმცა, ამ ოთახებში ვინ რას იტყვის, მნიშვნელობა არ აქვს. გადაწყვეტილებები წინასწარ არის მიღებული და მოსამართლემ გაგვიზიარა ის, რაც, ალბათ, რამდენიმე დღის წინ უთხრეს“, - აღნიშნა გიორგი დუმბაძემ.
თბილისის საქალაქო სასამართლოში რუსული კანონის საწინააღმდეგო აქციების მონაწილეთა პროცესი მიმდინარეობს. დღეს 2400-2400 ლარით დააჯარიმეს ფოტოგრაფი ლუკა ღვინიაშვილი, დიმიტრი იოსელიანი და ნიკოლოზ ალხაზაშვილი.
პოლიციამ ე.წ. უცხოეთის აგენტების შესახებ რუსული კანონის საწინააღმდეგო აქციებზე ადმინისტრაციული წესით ორასამდე ადამიანი დააკავა. სისხლის სამართლის პასუხისგებაშია მიცემული 9 პირი, რომლებსაც პროკურატურამ ბრალად პოლიციელზე თავდასხმა და ნივთის დაზიანება წარუდგინა.
