სათამაშოებში კიბოს და მუტაციის გამომწვევი ნივთიერებები აღმოჩნდა

მუსიკალური სათამაშოს ქსილოფონის (სერია/მარკა: frog insects knock xylophone მწარმოებელი - Mut) ლაბორატორიული შემოწმებისას დადგინდა, რომ სათამაშოს ძვრება საღებავი, რომელმაც შესაძლოა, გამოიწვიოს სასუნთქი გზების დახშობა და ბავშვის გაგუდვა, ვინაიდან ქსილოფონი განკუთვნილია სამ წლამდე ასაკის ბავშვებისთვის, რომელთა დამახასიათებელი ქცევაა სათამაშოების პირში ჩადება.

სამ წლამდე ასაკის ბავშვებისთვის განკუთვნილი სათამაშო არ უნდა შეიცავდეს მცირე ზომის ნაწილებს და არ უნდა ძვრებოდეს ისინი.

სათამაშო იარაღის (მწარმოებელი: Shengbo Toys Factory, სერია/მარკა უცნობი) ლაბორატორიული შემოწმებისას დადგინდა, რომ იარაღის ტყვიებს სძვრება მცირე ნაწილები, რომლებიც შეიძლება მოხვდეს ბავშვის ხორხში და გამოიწვიოს ზედა სასუნთქი გზების რესპირატორული გართულებები.

სათამაშო ქსილოფონის (სერია/მარკა: HP622, მწარმოებელი - HAO PENG DA TOYS FACTORY) ლაბორატორიული შემოწმებისას დადგინდა, რომ სათამაშოს სძვრება პატარა ნაწილი, რომელმაც გადაყლაპვის შემთხვევაში შესაძლოა გამოიწვიოს ზედა სასუნთქი გზების რესპირატორული გართულებები.

სააბაზანო სათამაშოს (სერია/მარკა: 111-1 მწარმოებელი - XIONG LI TOYS FACTORY) ლაბორატორიული შემოწმებისას დადგინდა, რომ სათამაშოს სძვრება პატარა ნაწილი, რომელმაც გადაყლაპვის შემთხვევაში შესაძლოა გამოიწვიოს ზედა სასუნთქი გზების რესპირატორული გართულებები.

სათამაშო ფრჩხილის ლაქის ნაკრების (სერია MBK-326, მწარმოებელი MEI BO KAI) ლაბორატორიული გამოკვლევის შედეგად დადგინდა, რომ სათამაშო შეიცავს 191.8 მგ/კგ ტყვიას, რაც 95.9-ჯერ აღემატება დასაშვებ ლიმიტს.

კომპანიებს საშიში სათამაშოების ბაზრიდან ამოღება დაევალათ.

სათამაშოებზე უსაფრთხოების მოთხოვნები 2021 წლის 1-ელი ივლისიდან ამოქმედდა. სათამაშოებზე კონტროლს ბაზარზე ზედამხედველობის სააგენტო ახორციელებს. ტექნიკური რეგლამენტის მოქმედება, რომელიც ევროკავშირის დირექტივის შესაბამისად არის მომზადებული, 14 წლამდე ასაკის ბავშვებისთვის განკუთვნილ სათამაშოებზე ვრცელდება. სააგენტო ახორციელებს სათამაშოების დოკუმენტურ შემოწმებას, ვიზუალურ და ლაბორატორიულ ექსპერტიზას. იმის გამო, რომ სათამაშოების მექანიკური და ქიმიური შემოწმებისთვის შესაბამისი ლაბორატორიები საქართველოში არ არსებობს, სააგენტო ნიმუშებს უცხოეთის აკრედიტებულ ლაბორატორიებში აგზავნის.

უსაფრთხოების მოთხოვნების დარღვევის აღმოჩენის შემთხვევაში სანქციების სახით გათვალისწინებულია მითითება, რეალიზაციის შეჩერება, პროდუქტის ამოღება, გამოთხოვა, ასევე, განადგურება იმ შემთხვევებში, თუ სათამაშო საშიშ ქიმიურ მინარევებს შეიცავს.

სათამაშოების უსაფრთხოებასთან დაკავშირებით შეგიძლიათ დაუკავშირდეთ ბაზარზე ზედამხედველობის სააგენტოს ცხელი ხაზის ნომერზე 14 83