ირანის პრეზიდენტი ებრაჰიმ რაისი, საგარეო საქმეთა მინისტრი ჰოსეინ ამირ-აბდოლაჰიანი და ხელისუფლების კიდევ რამდენიმე წარმომადგენელი დაიღუპა ვერტმფრენის ჩამოვარდნის შედეგად.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
ვერტმფრენი 19 მაისს, ირანის ჩრდილო-დასავლეთ ნაწილში, აღმოსავლეთ აზერბაჯანის პროვინციაში ჩამოვარდა. მანამდე, პრეზიდენტი და მაღალი თანამდებობის პირები აზერბაიჯანის საზღვართან იმყოფებოდნენ, სადაც აზერბაიჯანის პრეზიდენტ ილჰამ ალიევთან ერთად, კაშხლის გახსნის ღონისძიებაში მიიღეს მონაწილეობა. ისინი ქალაქ თავრიზისკენ მიფრინავდნენ. პრეზიდენტ რაისის კოლონაში სულ სამი ვერტმფრენი შედიოდა, დანარჩენმა ორმა „უვნებლად მიაღწია დანიშნულების ადგილს“.
სამძებრო-სამაშველო ღონისძიებები მთელი ღამის განმავლობაში მიმდინარეობდა. არსებული ინფორმაციით, თურქეთის უპილოტო საფრენმა აპარატებმა სითბოს წყარო დააფიქსირეს და ვერტმფრენის შესაძლო ადგილმდებარეობის კოორდინატები ირანის ხელისუფლებას გაუზიარეს. ადგილზე მისულ სამაშველო ჯგუფებს ვერტმფრენი სრულად დამწვარი დახვდათ.
ქვეყნის პრეზიდენტის და საგარეო საქმეთა მინისტრის გარდა, ბორტზე კიდევ 7 ადამიანი იყო. ავიაკატასტროფას ყველა ემსხვერპლა, მათ შორის, აღმოსავლეთ აზერბაიჯანის პროვინციის გუბერნატორი, პრეზიდენტის უსაფრთხოების სამსახურის თანამშრომლები და ეკიპაჟის წევრებიც.
ავიაკატასტროფის გამომწვევი მიზეზი ჯერ დადგენილი არ არის - ვერსიებს შორის განიხილება როგორც ცუდი ამინდი, ისე ვერტმფრენის ტექნიკური გაუმართაობა.
63 წლის ებრაჰიმ რაისი ირანის ისლამური რესპუბლიკის მერვე პრეზიდენტად 2021 წლის ივნისში აირჩიეს. რაისი, როგორც პრეზიდენტი, გავლენით მეორე პირი იყო უზენაესი ლიდერის, აიათოლა ალი ხამენეის შემდეგ.
ირანის კონსტიტუციის თანახმად, პრეზიდენტის გარდაცვალების შემთხვევაში, უზენაესი ლიდერის თანხმობით, მის უფლებამოსილებებსა და ფუნქციებს ვიცე-პრეზიდენტი ასრულებს. ახალი პრეზიდენტის არჩევნები მაქსიმუმ 50 დღის განმავლობაში უნდა ჩატარდეს.
