საქართველოს პრემიერ-მინისტრმა ირაკლი კობახიძემ განაცხადა, რომ თუ პრეზიდენტი სალომე ზურაბიშვილი პარლამენტის პირველ სხდომას არ დანიშნავს, ის არჩევნების ოფიციალური შედეგების გამოქვეყნებიდან ზუსტად მეათე დღეს, ანუ 25 ნოემბერს გაიმართება.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 23 ოქტომბერს თბილისში „ქართული ოცნების“ აქცია გაიმართება
- 4 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 5 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 6 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
კობახიძის თქმით, პარლამენტს ოპოზიციის ლეგიტიმაცია არცერთ ქვეყანაში არ სჭირდება.
„ეს რომ სხვანაირად იყოს, ვერცერთი დემოკრატიული სისტემა ვერ შედგებოდა ერთადერთი, ვისი ლეგიტიმაციაც სჭირდება ქვეყნის პარლამენტს, ეს არის მოსახლეობა, ამომრჩეველი, ქართველი ხალხი და, სწორედ, ქართველმა ხალხმა მიანიჭა პარლამენტს ლეგიტიმაცია.
რაც შეეხება პარლამენტის პირველ შეხვედრას, ვადები არის დადგენილი კონსტიტუციით.
ვვარაუდობთ, რომ საქართველოს ჯერ კიდევ ფორმალური პრეზიდენტი სალომე ზურაბიშვილი კიდევ ერთხელ დაარღვევს საქართველოს კონსტიტუციას და არ დანიშნავს პარლამენტის პირველ სხდომას. ამ შემთხვევაში საქართველოს პარლამენტი არჩევნების ოფიციალური შედეგების გამოქვეყნებიდან ზუსტად მეათე დღეს, ანუ 25 ნოემბერს შეიკრიბება. ეს არის, რასაც ადგენს საქართველოს კონსტიტუცია“, - განაცხადა კობახიძემ
ირაკლი კობახიძე ასევე მოელის, რომ საბოლოოდ, ოპოზიცია პარლამენტში მაინც შევა. მან მისი თქმით,„ერთიანობა - ნაციონალური მოძრაობისა“ და „კოალიცია ცვლილებებისთვის“ წევრებმა პარლამენტში არშესვლასთან დაკავშირებით განცხადებები „კანონდარღვევით დაწერეს იმისთვის, რომ შემდეგ აღარ მოუწიოთ განცხადების დაწერა“.
„მე მგონია, რომ ბოლოს ყველა შემოვა პარლამენტში. ... ეს განცხადებები არ არის კანონიერი, ლეგიტიმური. სინამდვილეში ყველამ იცის, რომ მათ მოუწევთ პარლამენტში შემოსვლა“, - აღნიშნა პრემიერ-მინისტრმა.
საქართველოს ცენტრალური საარჩევნო კომისიის თავმჯდომარე გიორგი კალანდარიშვილმა 16 ნოემბერს, შაბათს, ხელი მოაწერა 26 ოქტომბერს გამართული საპარლამენტო არჩევნების შემაჯამებელ ოქმს. ცესკოს საბოლოო შედეგების მიხედვით, საპარლამენტო არჩევნებში „ქართულმა ოცნებამ“ ხმების 53.93% მოიპოვა და საკანონმდებლო ორგანოში 150-დან 89 მანდატი მიიღო. ცესკოს მონაცემებით, „კოალიციას ცვლილებისთვის“ ხმების 11.03% და 19 მანდატი აქვს, „ერთიანობა - ნაციონალურ მოძრაობას“ - 10.17% და 16 მანდატი, „ძლიერ საქართველოს“ - 8.81% და 14 მანდატი, ხოლო პარტიას „გახარია საქართველოსთვის“ - 7.78% და 12 მანდატი.
ოპოზიციის წევრები ცესკოს მიერ გამოცხადებულ შედეგებს არ ეთანხმებიან და პარლამენტში შესვლაზე უარს ამბობენ, რაგან მიიჩნევენ, რომ არჩევნები „ტოტალურად გაყალბდა“. ისინი საერთაშორისო გამოძიების ჩატარებას და ხელახალი არჩევნების დანიშვნას ითხოვენ. არჩევნებს ლეგიტიმურად არ ცნობს არც საქართველოს პრეზიდენტი სალომე ზურაბიშვილი
