ალიევმა სომხეთს „ფაშისტური სახელმწიფო“ უწოდა და თქვა, რომ „ფაშიზმი უნდა განადგურდეს“

„სომხეთის შეიარაღება ახალ დაძაბულობას გამოიწვევს. ჩვენ ეს არ გვინდა. ჩვენ გვინდა მშვიდობა. ჩვენ გვინდა, რომ ომის გვერდი უკვე გადაფურცლული იყოს, თუმცა, ვხედავთ, რომ როგორც თავად სომხეთს, ისე მის ახალ პატრონებს ეს არ სურთ. ისინი ცხოვრობენ რევანშისტული იდეებით და სომხეთი რეალურად საფრთხის წყაროა რეგიონისთვის. დამოუკიდებელი სომხური სახელმწიფო არსებითად ფაშისტური სახელმწიფოა, იმიტომ, რომ თუ ამ ქვეყანას ფაშისტური იდეოლოგიის მატარებლები ხელმძღვანელობდნენ თითქმის 30 წელი, მაშინ მათვე ჩამოაყალიბეს ეს ქვეყანა თავის მსგავსად“, - ციტირებს აზერბაიჯანული მედია ალიევის განცხადებას.

ილჰამ ალიევის თქმით, „ფაშიზმი უნდა განადგურდეს“ და მას გაანადგურებს ან სომხეთის ხელმძღვანელობა, ან აზერბაიჯანი. „სხვა გამოსავალი არ არის“, - დასძინა ალიევმა.

„სომხეთმა დაუყოვნებლივ უნდა შეწყვიტოს შეიარაღება. საფრანგეთმა და სხვა ქვეყნებმა, რომლებიც მას იარაღს აწვდიან, უნდა შეწყვიტონ და გააუქმონ ეს კონტრაქტები. სომხეთისთვის უკვე მიწოდებული იარაღი უკან უნდა დაბრუნდეს. ეს არის ჩვენი პირობა.

ვისაც როგორც უნდა, ისე მიიღოს ეს. ვამბობ ჩემს სიტყვას და მათ და ასევე მათაც, ვინც ამის უკან დგანან იციან, რომ თუ ჩვენ რამეს ვამბობთ, ესე იგი, ამას ძალიან სერიოზულად ვუდგებით“, - განაცხადა აზერბაიჯანის პრეზიდენტმა.

სომხეთი და აზერბაიჯანი დიდი ხანია სამშვიდობო შეთანხმების გაფორმებაზე მოლაპარაკებებს აწარმოებენ. აზერბაიჯანული მხარის განცხადებით, შეთანხმების 17 პუნქტიდან 2 შეუთანხმებელი პუნქტი ეხება საერთაშორისო სარჩელებზე ორმხრივად უარის თქმას და საზღვარზე მესამე ქვეყნების წარმომადგენლების განთავსების დაუშვებლობას.