ახალი ამბები

„გერმანიის ელჩი „ლელოსთან“ ერთად რეგიონში დადიოდა წინასაარჩევნო კამპანიაზე. ბოლნისში იყო ჩასული „ლელოს“ ლიდერებთან ერთად. ასეთი არასერიოზული ქმედებების ფონზე ამ კაცის განცხადებას დიდ მნიშვნელობას ვერ მივანიჭებ. ეს არის ძალიან სამწუხარო მოვლენა.

გერმანია, რომელიც ტრადიციულად გამოირჩეოდა, როგორც პასუხისმგებლობით აღსავსე სახელმწიფო, ასეთ ელჩებს არ უნდა აგზავნიდეს საქართველოსნაირ ქვეყანაში.

ელჩი, რომელიც აკეთებს ანტიქართულ განცხადებებს, ჩვენთვის ვერ იქნება ღირებული. ეს არის ანტიქართული განცხადება და მე იმედი მაქვს, რომ ეს არის „ლელოს“ მხარდამჭერი ელჩის პირადი პოზიცია“, - უთხრა კობახიძემ ჟურნალისტებს.

პიტერ ფიშერი მიიჩნევს, რომ საქართველომ ევროპული გზიდან გადაუხვია. ის ჯერ კიდევ რუსული კანონის საბოლოოდ მიღებამდე საუბრობდა მოსალოდნელ შედეგებზე.

„ამ კანონით თქვენ ვერ შეუერთდებით ევროკავშირს, ამ კანონით თქვენ ვერ გახსნით გაწევრიანების მოლაპარაკებებს ევროკავშირთან. ძალიან მარტივია: თუ გსურთ შეუერთდეთ ევროკავშირს, უნდა დააკმაყოფილოთ ჩვენი საკანონმდებლო სტანდარტები - ნორმები და ღირებულებები. ეს კანონი არ არის ევროპულ კანონმდებლობასთან შესაბამისობაში. ეს არის ჩვენი პირველი გზავნილი. ახლა 10 კანდიდატი ქვეყანაა. საქართველო მათ შორის მოწინავე იყო და ამჟამად ფაქტობრივად ბოლო ადგილზე დგას“, - განაცხადა ელჩმა 29 მაისს.

საქართველოს პარლამენტმა ე.წ. „უცხოეთის აგენტების“ შესახებ რუსულ კანონზე პრეზიდენტის ვეტო 28 მაისს დაძლია.