არჩევნების შემაჯამებელი ოქმი სასამართლოში გაასაჩივრეს

„საია საპარლამენტო არჩევნებზე ხმის ფარულობის დარღვევის ფაქტებზე ბრძოლას აგრძელებს. ხმის მიცემის ფარულობა საქართველოს კონსტიტუციით გარანტირებული უფლებაა და მისი დარღვევა დაუშვებელია. ეს უფლება დემოკრატიული პროცესების საფუძველია, მისი უგულებელყოფა კი საარჩევნო პროცესის ლეგიტიმაციას არღვევს“, - წერია ორგანიზაციის მიერ გავრცელებულ განცხადებაში.

საპარლამენტო არჩევნებში ხმის ფარულობის დარღვევა საიას 73 საოლქო საარჩევნო კომისიაში ჰქონდა გასაჩივრებული. ორგანიზაცია იმ 2263 უბნის შედეგების ბათილად ცნობას ითხოვდა, სადაც არჩევნები ტექნოლოგიების გამოყენებით ჩატარდა. საოლქო კომისიებმა საჩივრები არ დააკმაყოფილეს, რის გამოც საიამ სასამართლოს მიმართა. 24 რაიონული/საქალაქო სასამართლოდან ხმის ფარულობის დარღვევა მხოლოდ თეთრიწყაროს მოსამართლე ვლადიმერ ხუჭუამ დაადგინა და 30 საარჩევნო უბნის შედეგები ბათილად ცნო. თუმცა, მოსამართლე ხუჭუას გადაწყვეტილება სააპელაციო ინსტანციამ გააბათილა.

ცენტრალური საარჩევნო კომისიის თავმჯდომარე გიორგი კალანდარიშვილმა შემაჯამებელი ოქმის ხელმოწერამდე თქვა, რომ „არ არსებობს რაიმე ხელშესახები გარემოება, რომელიც მიუთითებდა იმაზე, რომ არჩევნები იყო მანიპულირებილი“. ოქმს ხელი მოაწერა ცესკოს მდივანმა, გიორგი ჯავახიშვილმაც.

შემაჯამებელი ოქმის მიხედვით, საპარლამენტო არჩევნებში „ქართულმა ოცნებამ“ ხმების 53.93% მოიპოვა და საკანონმდებლო ორგანოში 150-დან 89 მანდატი მიიღო. „კოალიციას ცვლილებისთვის“ ხმების 11.03% და 19 მანდატი აქვს, „ერთიანობა - ნაციონალურ მოძრაობას“ - 10.17% და 16 მანდატი, „ძლიერ საქართველოს“ - 8.81% და 14 მანდატი, ხოლო პარტიას „გახარია საქართველოსთვის“ - 7.78% და 12 მანდატი. ცესკოს მონაცემებს მხოლოდ „ქართული ოცნება“ ეთანხმება, ოპოზიცია კი მიიჩნევს, რომ არჩევნები გაყალბდა.