აშშ და სომხეთი სტრატეგიული პარტნიორობის დოკუმენტს მოაწერენ ხელს

როგორც სომხეთის საგარეო საქმეთა სამინისტროში განაცხადეს, ხელმოწერა ერევნის დროით 22:00 საათზე გაიმართება.

გასულ კვირაში მირზოიანმა არ უარყო სტრატეგიულ პარტნიორობაზე შეთანხმების გაფორმების შესაძლებლობა. „ჩვენ გვაქვს სტრატეგიული დიალოგი და შევთანხმდით, რომ მას სტრატეგიული პარტნიორობის დონეზე ავიყვანთ“, - განაცხადა მინისტრმა.

სომხეთმა აშშ-სთან და ევროკავშირთან დაახლოება 2023 წლიდან დააჩქარა, მას შემდეგ, რაც პრემიერ-მინისტრმა ნიკოლ ფაშინიანმა რუსეთი და „კოლექტიური უსაფრთხოების ხელშეკრულების ორგანიზაცია“ მთიანი ყარაბაღის კონფლიქტის დროს უმოქმედობაში დაადანაშაულა, რის შედეგადაც თვითგამოცხადებული რესპუბლიკის მთელი ტერიტორია აზერბაიჯანის კონტროლის ქვეშ მოექცა.

ამ ფონზე, „ქართული ოცნება“ საქართველოს სულ უფრო აშორებს დასავლეთს. 2024 წლის ნოემბრის ბოლოს, აშშ-მა საქართველოსთან სტრატეგიული პარტნიორობის შეჩერების გადაწყვეტილება მიიღო. სახელმწიფო დეპარტამენტის შეფასებით, „ქართული ოცნების“ სხვადასხვა სახის ანტიდემოკრატიული ქმედებით დაირღვა ძირითადი პრინციპები აშშ-საქართველოს სტრატეგიული პარტნიორობისა, რომელიც ეფუძნებოდა საერთო ღირებულებებსა და ერთგულებას: დემოკრატიის, კანონის უზენაესობის, სამოქალაქო საზოგადოების, ადამიანის უფლებების დაცვისა და ანტიკორუფციულ ძალისხმევის მიმართ.

სტრატეგიული პარტნიორობის შეჩერებას წინ უძღოდა აშშ-ის მიერ საქართველოსთან ორმხრივი თანამშრომლობის ყოვლისმომცველი გადახედვა, რაც „ქართული ოცნების“ მიერ ე.წ. აგენტების შესახებ რუსული კანონის ხელახლა ინიცირებასა და მიღებას მოჰყვა.