ბაქოში BBC-ის აზერბაიჯანული სამსახურის ოფისი დაიხურა, თანამშრომლებმა კი სიტუაციის გარკვევამდე საქმიანობა შეაჩერეს. ბრიტანული კორპორაციის მიერ გავრცელებულ განცხადებაში ნათქვამია, რომ ეს „იძულებითი გადაწყვეტილება“ ქვეყნის საგარეო საქმეთა სამინისტროდან სიტყვიერი შეტყობინების შემდეგ მიიღეს.
ახალი ამბები
მკითხველის რჩეული
- 1 მზია ამაღლობელის მხარდამჭერი აქციის გამო შსს-მ 9 ადამიანს სამართალდარღვევის ოქმი შეუდგინა
- 2 მოსკოვი მზადაა, რუსეთ-საქართველოს „ურთიერთობების ნორმალიზაცია“ გააგრძელოს
- 3 გომელაური, „ხარება“ და სხვა დასანქცირებული პოლიციელები ღირსების ორდენით დააჯილდოვეს
- 4 პატიმრის ადვოკატი: „სახის არცერთი ძვალი მთელი არ აქვს, ეს აღწერილი არაა და რატომ, გაუგებარია“
- 5 პოლიციის აკადემიის რექტორად სავარაუდო კორუფციაში მხილებული ლელა ჩიქოვანი დაინიშნა
- 6 თბილისის მერია „რიყის დოქებთან“ 16 წლის ბიჭის დაღუპვაზე პასუხისმგებლობას ირიდებს
BBC-ი აცხადებს, რომ ხელისუფლების გადაწყვეტილება პრესის თავისუფლების წინააღმდეგაა მიმართული და ის ძალიან გაართულებს BBC-ის ჟურნალისტების მიერ მოვლენების გაშუქებას „აზერბაიჯანში და აზერბაიჯანისთვის, აუდიტორიისთვის როგორც ქვეყნის შიგნით, ისე მის საზღვრებს გარეთ“.
მანამდე სახელმწიფოს მიერ კონტროლირებადმა მედიამ გაავრცელა ინფორმაცია, რომ აზერბაიჯანის ხელისუფლება აპირებს, ქვეყანაში მომუშავე BBC-ის თანამშრომლების რაოდენობა ერთამდე შეამციროს. BBC-ის ამის შესახებ წერილობითი შეტყობინება რა მიუღია, მათ შეკითხვებს არც აზერბაიჯანის საგარეო საქმეთა სამინისტროში უპასუხეს.
აზერბაიჯანის საგარეო საქმეთა სამინისტროს სპიკერის, აიხან ჰაჯიზადეს კომენტარი, სადაც ის BBC-ს საკითხის პოლიტიზირებაში ადანაშაულებს, 20 თებერვალს გავრცელდა. მისი განმარტებით, BBC-ის არ აქვს სამართლებრივი საფუძველი აზერბაიჯანში საქმიანობა განახორციელოს როგორც უცხოური მედიასტრუქტურის წარმომადგენლობამ.
„გადაწყვეტილება წარმომადგენლობის დახურვის შესახებ არ უკავშირდება ჩვენს ქვეყანაში სამაუწყებლო კომპანიის BBC-ის საკორესპონდენტო საქმიანობას და ითვალისწინებს ერთ კორესპონდენტზე აკრედიტაციის გაცემას. მსგავსი გადაწყვეტილებები მიღებული იქნა სხვა უცხოურ მედიასტრუქტურებთან მიმართებაშიც“,- განაცხადა ჰაჯიზადემ.
BBC აზერბაიჯანში 1994 წლიდან მუშაობს. რადიოს ფუნქციონირება 2011 წელს შეწყდა მას შემდეგ, რაც აზერბაიჯანის მთავრობამ FM სიხშირეებზე უცხოური რადიოსადგურების მაუწყებლობის აკრძალვის გადაწყვეტილება მიიღო. ამის შემდეგ BBC-მ ონლაინ მუშაობა გააფართოვა. კომპანიის ინფორმაციით, BBC News Azerbaijan-ი კვირაში საშუალოდ მილიონ ადამიანს სწვდებოდა და მისი აუდიტორია მზარდი იყო.
