კობახიძემ აშშ-ში ვიზიტზე უარი რუსული კანონის გამო თქვა

„პრემიერ-მინისტრი აშშ-ში მიწვეულ იქნა დათქმით, რომ ვიზიტამდე საქართველოს პარლამენტს დროებით უნდა შეეჩერებინა „უცხოური გავლენის გამჭვირვალობის შესახებ“ კანონპროექტის განხილვა. დათქმით ვიზიტის განხორციელება არ შეესაბამება პარტნიორობის სულისკვეთებას, რომელიც ურთიერთპატივისცემასა და ურთიერთნდობაზე უნდა იყოს დაფუძნებული, რასთან დაკავშირებითაც აშშ-ის ელჩს დეტალური განმარტება წარედგინა“, - განაცხადეს საგარეო საქმეთა სამინისტროში.

ამერიკის შეერთებული შტატები შეშფოთებულია „ქართული ოცნების“ მიერ ხელახლა ინიცირებული კანონით, რომელსაც სახელმწიფო დეპარტამენტი „კრემლით შთაგონებულს“ უწოდებს და მიიჩნევს, რომ ის ძირს გამოუთხრის აშშ-საქართველოს ურთიერთობას, გავლენა ექნება საქართველოს მისწრაფებებზე, გახდეს ევროკავშირისა და ნატოს წევრი.

ელჩმა დანიგანმა 2 მაისს განაცხადა, რომ ახლახან საქართველოს მთავრობის მაღალი თანამდებობის პირები შეერთებული შტატების მაღალი თანამდებობის პირებთან სტრატეგიული პარტნიორობისა და აშშ-ის დახმარების შესახებ ნებისმიერი შეკითხვის განსახილველად მიიწვიეს, თუმცა, ქართულმა მხარემ მიწვევაზე უარი თქვა.  

პარლამენტმა 3 აპრილს დაინიცირებული რუსული კანონი 1-ელ მაისს უკვე მეორე მოსმენით მიიღო. კენჭისყრამდე ორი დღით ადრე „ქართულმა ოცნებამ“ კანონის მხარდასაჭერად, პარლამენტის შენობის წინ, კონტრაქცია მოაწყო, სადაც პარტიის ლიდერი ბიძინა ივანიშვილი ანტიდასავლური გზავნილებით გამოვიდა. ის თავს დაესხა არასამთავრობო ორგანიზაციებს და ისინი უცხოეთიდან დაფინანსებულ „აგენტურად“ მოიხსენია.

რუსული კანონი უცხოეთის აგენტებად რეგისტრაციას ავალდებულებს დამოუკიდებელ მედია და არასამთავრობო ორგანიზაციებს, რომლებიც საერთაშორისო ფონდების საგრანტო მხარდაჭერით მუშაობენ და ხელისუფლება ან მასთან დაკავშირებული ჯგუფები ვერ აკონტროლებენ.

მრავალათასიანი საპროტესტო აქციებისა და რუსული კანონის გაწვევის თაობაზე საერთაშორისო პარტნიორების მოწოდებების მიუხედავად, „ქართული ოცნება“ კანონის მიღებას აპირებს.

ამ თემაზე:

შავგულიძე: ეს კანონი დაგვტოვებს მარტოს რუსეთის წინაშე, გაგვაუცხოებს ცივილიზებული სამყაროსგან