პროკურატურამ მამუკა ხაზარაძე და ზურაბ ჯაფარიძე გამოკითხვაზე დაიბარა

„დამირეკეს გენერალური პროკურატურიდან, მიბარებენ მოწმის სახით გამოკითხვაზე, მივალ არჩევნების გაყალბების მტკიცებულებებით და ვნახავ, ბიძინას მორჩილი პროკურატურა როგორ მოიქცევა. ყველგან გავიმარჯვებთ!“, - დაწერა Facebook-ზე ხაზარაძემ, კოალიცია „ძლიერი საქართველოს“ დამფუძნებელმა.

„კოალიცია ცვლილებისთვის“ ერთ-ერთი ლიდერი ზურაბ ჯაფარიძე გამოკითხვაზე 6 ნოემბერს, 13:00 საათზეა დაბარებული. უცნობია, მივა თუ არა ის საგამოძიებო უწყებაში.

ცენტრალურ საარჩევნო კომისიაში 29 ოქტომბერს განაცხადეს, რომ პრეზიდენტის და ოპოზიციური პოლიტიკური პარტიების წარმომადგენლების მხრიდან არჩევნების „სავარაუდო გაყალბების“ ბრალდებებმა უკვე ფართო მასშტაბი მიიღო, რაც „საჭიროებს კომპლექსური და ობიექტური გამოძიების ჩატარებას“. მეორე დღესვე პროკურატურამ არჩევნების გაყალბების მუხლით სისხლის სამართლის საქმე აღძრა და პირველი, ვინც გამოკითხვაზე დაიბარა, პრეზიდენტი სალომე ზურაბიშვილი იყო. ზურაბიშვილმა პროკურატურაში მისვლაზე უარი თქვა და საგამოძიებო უწყებას მოუწოდა, „პრეზიდენტთან პოლიტიკურ ანგარიშსწორებას მოეშვას“.

პროკურატურამ გამოკითხვაზე დაიბარეს პარტია „გახარია საქართველოსთვის“ თავმჯდომარის მოადგილე ნათია მეზვრიშვილიც. მისის თქმით, აღნიშნული გამოძიება „ყალბია“ და მისი ერთადერთი მიზანია, დაადგინოს, თითქოს, არჩევნები არ გაყალბებულა. შესაბამისად, მეზვრიშვილი საგამოძიებო ორგანოში მისვლას არ აპირებს. იგივე გადაწყვეტილება აქვს მიღებული სადამკვირვებლო ორგანიზაციების კოალიციის, „ჩემი ხმის“ სპიკერს, ლონდა თოლორაიას.

საქართველოს ცენტრალური საარჩევნო კომისიის მონაცემებით, 26 ოქტომბრის საპარლამენტო არჩევნებში „ქართულმა ოცნებამ“ ხმების 53.93% მიიღო. ამ შედეგის ლეგიტიმურობას არ აღიარებენ ბარიერგადალახული ოპოზიციური პარტიები, რომელთა შორის ხმები ასე გადანაწილდა:

• „კოალიცია ცვლილებისთვის“ (11.037%)
• „ერთიანობა - ნაციონალური მოძრაობა“ (10.164%)
• „ძლიერი საქართველო“ (8.814%)
• „გახარია საქართველოსთვის“ (7.771%)

პრეზიდენტი სალომე ზურაბიშვილიც მიიჩნევს, რომ არჩევნები „ტოტალურად გაყალბდა“ და საქართველო „რუსული სპეცოპერაციის მსხვეპლი“ გახდა.