Ապրիլի 29-ին Իվանիշվիլիի հայտարարած բռնաճնշումները սկսվել են. ոչ կառավարական կազմակերպություններ

«Ապրիլի 29-ին Բիձինա Իվանիշվիլիի հայտարարած արտաքին վեկտորի փոփոխությունն ու ռեպրեսիաներն արդեն տեսանելիորեն իրականացվել են։ Հարյուրավոր քաղաքացիների հասցեին հնչած սպառնալիքների և վիրավորանքների կոչերը վերածվել են ֆիզիկական հարձակումների և հաշվեհարդարի կազմակերպված քաղաքական գործիչների և ակտիվիստների դեմ։

Օլիգարխներն ու նրանց խամաճիկները մոռանում են, որ Վրաստանը Ռուսաստան չէ։ Վրացիները գիտեն ազատության գինը։ Ռուսաստանի անվտանգության ծառայության մեթոդներով մեր պայքարը երկրի եվրոպական ապագայի համար չի կարող նսեմացվել։

Վրացիները երբեք հավանություն չեն տա թիկունքից մարդու վրա հարձակվելուն, միջանցքներում հետապնդելուն կամ տան դուռը ջարդել փորձելուն, որտեղ փոքր երեխա կա, այսպես է վարվում ռուսական ռեժիմը», - հասարակական կազմակերպությունների համատեղ հայտարարությունը ընթերցել է «Սափարիի» տնօրեն Բաիա Պատարաիան։

Քաղաքացիական սեկտորի ներկայացուցիչները մտադիր են իրավական օգնություն ցուցաբերել բոլոր տուժածներին։ Նրանց խոսքով՝ ակտիվ քաղաքացիների վրա թիրախային հարձակման յուրաքանչյուր դեպքին կհետևեն մինչև վերջ և կպահանջեն բացահայտել մեղավորներին։

«Ազատությունը վրաց ժողովրդի հիմնական արժեքն է։ Այդ իսկ պատճառով մենք կանգնած ենք և կանգնելու ենք Վրաստանի եվրոպական ապագայի պահակակետին՝ պաշտպանելու այս երկիրը ռուսական մեթոդներից և բռնություններից։ Վրաց ժողովուրդը հաղթանակով կավարտի այս պայքարը, իսկ մեղավորներին կտրվի համապատասխան պատասխան»,- ասել են հասարակական կազմակերպությունների ներկայացուցիչները։

Մայիսի 8-ին գիշերային ժամերին Թբիլիսիում մի քանի հարձակում է տեղի ունեցել ռուսական օրենքի հակառակորդների վրա.

• Անհայտ անձինք ծեծի են ենթարկել «Ազգային շարժման» անդամ Դիմիտրի Չիքովանիին։ Նա դեմքի բազմաթիվ վնասվածքներ ունի։ Հարձակմանը նախորդել էր ապրիլի 23-ին վարչապետ Իրակլի Կոբախիձեի հայտարարությունն այն մասին, թե ռուսական օրենքի դեմ անցկացվող ակցիաներին «Դավիթ Կեզերաշվիլիի և Դիմա Չիքովանիի կողմից 1000 լարիով են ֆինանսավորվող» մարդիկ են մասնակցում։ Չիքովանին «Ֆորմուլա» հեռուստաընկերության հիմնադիր և Վրաստանի պաշտպանության նախկին նախարար Դավիթ Կեզերաշվիլիի կնոջ եղբայրն է։
• Բնակարանի մուտքի մոտ անհայտ անձինք ֆիզիկական բռնության են ենթարկել «Ճավճավաձեի կենտրոնի» գիտաշխատող Գիա Ջափարիձեին։ Նա «Գիրչի՝ ավելի շատ ազատություն» կուսակցության առաջնորդ Զուրաբ Ջափարիձեի եղբայրն է և ակտիվորեն մասնակցում է ռուսական օրենքի դեմ ակցիաներին։ «Ինձ սկսեցին ուղղակի ծեծել։ Ինչ-որ փայտերով էին։ Ինչո՞ւ եմ ես դեմ ռուսական օրենքին, դա էին ասում»,- միջադեպից հետո ասել է Գիա Ջափարիձեն։ Նա վնասվածքներ ունի գլխի և դեմքի շրջանում։ Ինչպես հայտնել են Խեչինաշվիլիի կլինիկայում՝ առկա է գանգուղեղային վնասվածք։
• Երեք անհայտ անձինք հարձակվել են ակցիաների կազմակերպիչներից և մասնակիցներից մեկի՝ բայքեր Լաշա Ղվինիանիձեի վրա իր իսկ տան դիմաց։ Նա կարծում է, որ իր գտնվելու վայրը հայտնաբերել են հարձակումից առաջ կատարած հեռախոսազանգի միջոցով: Ակտիվիստին նախորդել է սպառնալիք. «Զանգել են 72-ամյա հորս, որին ուղիղ ասել են՝ որդուդ կանգնեցրու։ Փաստ է, որ պետական ​​գերատեսչություններից անձնական տվյալներ են արտահոսել այնքան մանրամասն, որ նրանք գիտեն հասցեներն ու հեռախոսահամարները, այդ թվում՝ ընտանիքի անդամների»,- ասում է դեռևս կլինիկայում գտնվող ակտիվիստը։

Մայիսի 7-ին Թբիլիսիում հարձակման են ենթարկվել «Տեղեկատվության ազատության զարգացման ինստիտուտ» հասարակական կազմակերպության տնօրեն Գիորգի Կլդիաշվիլին և «Ֆորմուլա»-ի նկարահանող խումբը, իսկ մայիսի 5-ին Լանչխութիում ծեծի են ենթարկվել ռուսական օրենքի դեմ բողոքի ցույցերի ակտիվ մասնակից, ուսուցիչ Լադո Աբխազավան և նրա որդին։ Դատախազությունը մեկ անձի մեղադրանք է առաջադրել ֆիզիկական բռնության համար, թեև Աբխազավան ասել է, որ հարձակմանը երկու մարդ է մասնակցել։ Մայիսի 3-ին Թբիլիսիում բողոքի ակցիային մասնակցող երիտասարդները ֆիզիկական բռնության են ենթարկվել, ինչի համար Ներքին գործերի նախարարության կողմից ոչ ոք չի ձերբակալվել։ Բացի այդ, վերջին օրերին անհայտ անձինք կապվում են մասնավոր հեռախոսահամարներով, հայհոյում ու սպառնում քաղաքացիներին, այդ թվում՝ լրագրողների, քաղաքացիական ակտիվիստների, ուսանողների, ովքեր ակտիվորեն դեմ են արտահայտվում ռուսական օրենքին։