გორის მუნიციპალიტეტის სოფელ ახალშენთან, ტყეში, გარდაცვლილი იპოვეს სამხედრო მოსამსახურე, 41 წლის ირაკლი აფრიამაშვილი. თავდაცვის სამინისტრო ადასტურებს, რომ კაპრალმა თავი მოიკლა.
ახალი ამბები
მკითხველის რჩეული
- 1 „გამოვძებნით ძალას, რათა ბოდიში მოვიხადოთ“ - ივანიშვილი 2008 წლის ომზე
- 2 ვის მოვუხადოთ ბოდიში შინდისის გმირების ოჯახებმა? - გამოხმაურება ივანიშვილის განცხადებაზე
- 3 კობახიძემ დააკონკრეტა რომელი ოპოზიციური პარტიების აკრძალვას გეგმავს „ქართული ოცნება“
- 4 „ძლიერი საქართველოს“ საგარეჯოს ორგანიზაციის წევრს სასამართლომ გირაო შეუფარდა
- 5 რასაც ახლა საქართველოს ხელისუფლება აკეთებს, ეროვნული იდენტობის გაცნობიერებაა - ლავროვი
- 6 2025 წლიდან გიორგი მამარდაშვილი „ლივერპულის“ მეკარე გახდება
ირაკლი აფრიამაშვილი ახალციხიდან იყო. გორში ის ბოლო ორი წლის განმავლობაში მსახუროდა.
„სამხედრო მოსამსახურე დათხოვნაში იმყოფებოდა. გორში, თავისი ფაქტობრივი საცხოვრებლის მახლობლად, სოფელ ახალშენის განაპირას ჩამომხრჩვალი იპოვეს“, - ნათქვამია სამინისტროს განცხადებაში.
საქმეზე გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.
ბოლო ორ კვირაში, ეს გორში სამხედრო მოსამსახურის გარდაცვალების მეორე შემთხვევაა.
28 დეკემბერს ნაქირავები ბინის აბაზანაში გარდაცვლილი იპოვეს კაპრალი, 41 წლის ივანე გოგიძე. როგორც თავდაცვის სამინისტრომ განაცხადა, პირველადი ინფორმაციით, გარდაცვალების მიზეზი, სავარაუდოდ, წყლის გამათბობლის გაუმართაობა და ბუნებრივი აირით მოწამვლა გახდა.
2023 წლის წლის 28 ოქტომბერს ცნობილი გახდა, რომ ვაშლიჯვრის სამხედრო ბაზაზე 19 წლის რევაზ ჩხეიძე დაიღუპა. ახალგაზრდას, რომელიც ხობიდან იყო, სავალდებულო სამხედრო სამსახური ერთ თვეში უნდა დაემთავრებინა. გარდაცლილის ახლობლების თქმით, ერთ-ერთი ვერსიით, მან თავი ცეცხლსასროლი იარაღიდან გასროლით მოიკლა. თავდაცვის სამინისტროს მომხდარზე კომენტარი არ გაუკეთებია.
2023 წლის 8 ივნისს მარნეულის სამხედრო ნაწილში დაიღუპა 18 წლის იუსიფ ნასიბოვი, რომელიც ასევე სავალდებულო სამხედრო სამსახურს იხდიდა. სამინისტროს წინასწარი ოფიციალური ვერსიით, მან თავი მოიკლა.
2023 წლის 28 აპრილს, გვიან ღამით თავდაცვის სამინისტროს ტერიტორიაზე გარდაცვლილი იპოვეს სერჟანტი, 45 წლის მამუკა მელაძე. სამინისტროს განცხადებით, სერჟანტმა თავი ჩამოიხრჩო. გამოძიების დასრულებამდე უწყებამ თქვა, რომ მომხდარი სავარაუდოდ ოჯახურ კონფლიქტს უკავშირდებოდა.
თავდაცვის სამინისტროს საქართველოს შეიარაღებულ ძალებში სუიციდის სტატისტიკური მონაცემები გამოქვეყნებული არ აქვს. თუმცა, თვითმკვლელობის მაღალი მაჩვენებლის გამო, უწყებაში ჯერ კიდევ 2015 წელს შეიქმნა ფსიქოლოგიური მხარდაჭერის დეპარტამენტი. ოფიციალური პირები აცხადებდნენ, რომ ჯარში სუიციდის ერთ-ერთი მთავარი მიზეზი აზარტულ თამაშებზე დამოკიდებულება (გემბლინგი) და აქედან დაგროვილი ვალები იყო. სამინისტროს ინიციატივით, კანონში ცვლილებები შევიდა და სამხედროებს აზარტული თამაშები აეკრძალათ. ფსიქოლოგიური მხარდაჭერის დეპარტამენტი ახლაც ფუნქციონირებს, თუმცა მის მიერ გაწეული საქმიანობის შესახებ სამინისტროს ვებგვერდზე ინფორმაცია არ მოიპოვება.
ამ თემაზე წაიკითხეთ სტატია:
„შვილი ჯარში ჯანმრთელი გავგზავნე, მკვდარი დამიბრუნეს“ - სუიციდი თავდაცვის ძალებში
