„ამ ხმაურის, დაძაბულობის ფონზე ძალიან რთულია, რომ პროცესი გაგრძელდეს. სამინისტრო და დაინტერესებული მხარეები უნდა იყვნენ კონსტრუქციულ რეჟიმში“, - განაცხადა საქართველოს ჯანდაცვის მინისტრმა, ზურაბ აზარაშვილმა აქონდროპლაზიის მქონე ბავშვების მშობლების პროტესტთან დაკავშირებით.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 აქციებზე ჟურნალისტებისთვის მუშაობაში უკანონოდ ხელის შეშლის ფაქტებზე გამოძიება დაიწყო
- 6 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
მთავრობის სხდომის დასრულების შემდეგ გამართულ ბრიფინგზე აზარაშვილმა თქვა, რომ შექმნილი პრობლემების გამოსწორებას სამინისტრო ყოველდღე ცდილობს. მან მშობლებს, რომლებიც ღამეებს მთავრობის ადმინისტრაციასთან ათევენ და აქციებს მართავენ, მოუწოდა, მუშაობა კონსტრუქციულ რეჟიმში, სამინისტროში გააგრძელონ.
„ჩვენ არასდროს გვითქვამს უარი მოლაპარაკების რეჟიმზე. ორი კვირის წინ, თუ სწორად მახსოვს, ჩემთან შეხვედრაც იყო და სამწუხაროდ, პროცესი მაინც ქუჩაში გაგრძელდა. ძალიან სამწუხაროა, რომ ასე ხდება, იმიტომ, რომ ძალიან მნიშვნელოვანი კითხვები მოდის პარტნიორების და ყველა იმ ჩართული ქვეყნების თუ მხარეების მხრიდან, თუ რატომ ხდება ის, რომ პროტესტის ფონზე გიწევთ გადაწყვეტილების მიღება, იმიტომ, რომ ყველანაირი ზეწოლისა და ზემოქმედებისგან თავისუფალი უნდა იყოს სამუშაო ჯგუფიც და უწყებათაშორისი საბჭოც, რომ მიიღოს ბავშვების საუკეთესო ინტერესებიდან გამომდინარე გადაწყვეტილება. ეს ფონი ხელს უშლის და აფერხებს ასეთი გადაწყვეტილების მიღებას.
არანაირად არ წაადგება და არანაირად არ დააჩქარებს პროცესს ასეთი ულტიმატუმის ენით საუბარი - რაღაც კონკრეტული თარიღის მითითების თუ რაღაც მთავრობის გადაწყვეტილების“, - განაცხადა აზარაშვილმა.
ჟურნალისტის შეკითხვას, როდის შეიძლება მშობლებმა აქონდროპლაზიის სამკურნალო მედიკამენტის ქვეყანაში შემოტანის თარიღი გაიგონ, მინისტრმა თქვა, რომ ეს საკითხი მთავრობაზე არ არის დამოკიდებული.
„მულტიდისციპლინარული სამუშაო ჯგუფი, უწყებათაშორისი საბჭო, ასევე პროტოკოლსა და გაიდლაინზე მომუშავე ჯგუფი ამ ყველაფერს იხილავს და ზუსტად მათი ანალიზიდან, მათი დასკვნებიდან გამომდინარეა შესაძლებელი, ვიმსჯელოთ იმაზე, თუ რა მეთოდებით, როდიდან შევძლებთ, რომ დავნერგოთ ქვეყანაში აღნიშნული დაავადების სამკურნალო მედიკამენტი იქნება ეს, თუ სხვადასხვა მეთოდები. ეს არ უნდა იყოს პირობის მიცემის მსგავსი. არსებობს სხვადასხვა ქვეყნების გამოცდილებები, სხვადასხვა გამოწვევები, კითხვები ამ მედიკამენტთან მიმართებაში, ამიტომ საბჭო მსჯელობს, რომ შესაბამისი გადაწყვეტილება მიიღოს. სამწუხაროდ, მე არ შემიძლია [მსჯელობისთვის] ვადები მივცე. ეს არის სრულიად დამოუკიდებელი საბჭო. ჩემგან რაღაც კონკრეტული ვადის მიცემა, არასწორი იქნება, რადგანაც სხვადასხვა მეცნიერულ დასაბუთებებზე, კვლევებსა და შედეგებზე მიდის მსჯელობა“, - აღნიშნა მინისტრმა.
მთავრობის სხდომის მიმდინარეობის დროს მშობლებმა თავიანთი პოზიცია კიდევ ერთხელ დააფიქსირეს და განაცხადეს, რომ მათი მიზანი არის არა „პროტესტი პროტესტისთვის“, არამედ შედეგი - წამლის მიღება. ერთ-ერთი დედის, ქეთევან ბეგიაშვილის თქმით, 29 დეკემბრის შემდეგ ჯანდაცვის მინისტრის პირველი მოადგილისგან, თამარ გაბუნიასგან ესმით სიტყვები, რომ სამინისტროს დრო სჭირდება:
„ამბობს, რომ „ბიომარინთან“ მოლაპარაკებები მიმდინარეობს, როდესაც პირადი საუბრის დროს ვკითხე, რა მოგწერათ „ბიომარინმა“ მეთქი, - რა ვქნა, პასუხს აგვიანებს, თქვენსავით აქციები ვერ მოვაწყეო. ასე დაგვცინა კიდეც. თურმე, ჩვენ აქციები გვსიამოვნებს. თუ პრემიერი აცხადებს მზაობას, რომ ფინანსები არის, მაშინ რა არის პრობლემა? გამოვიდეს ბატონი პრემიერი, ხომ ჰქონდა საკმარისი დრო, ერთი კვირა? თამარ გაბუნიაც, ჯანდაცვის მინისტრიც მხოლოდ ორაზროვნად საუბრობენ. ალბათ ისინიც პრემიერისგან ელოდებიან პასუხს“.
აქონდროპლაზიის დიაგნოზის მქონე ბავშვების მშობლები 16 თვეა სამინისტროსგან ითხოვენ პასუხს, როდის დააფინანსებს სახელმწიფო მათი შვილებისთვის აუცილებელ პრეპარატ „ვოსორიტიდს“ (ბრენდული სახელწოდება Voxzogo). ისინი უკვე 14 დღეა მთავრობის ადმინისტრაციასთან, ღია ცის ქვეშ ათევენ ღამეებს და პრემიერ-მინისტრ ირაკლი ღარიბაშვილთან შეხვედრას ითხოვენ.
24 აპრილს, მთავრობის სხდომაზე, ღარიბაშვილმა განაცხადა, რომ მედიკამენტის შესაძენად საჭირო 10 მილიონი ლარი მთავრობისთვის „არ არის პრინციპული და კრიტიკული“. მისი თქმით, აქონდროპლაზიის მქონე ბავშვების სიცოცხლეს საფრთხე არ ემუქრება და ვიდრე მთავრობა წამლის დაფინანსების საკითხზე გადაწყვეტილებას მიიღებს, საჭიროა დამატებითი კვლევების დასრულება.
Voxzogo-მ, რომელსაც კომპანია „ბიომარინი“ აწარმოებს, 2021 წელს აშშ-ის წამლისა და საკვების ადმინისტრაციის (FDA) აკრედიტაცია მიიღო, როგორც აქონდროპლაზიის მქონე ხუთი წლის და უფროსი ასაკის ბავშვებში ზრდის გასაუმჯობესებელმა პრეპარატმა. იმავე წლიდან Voxzogo ნებადართულია ევროპის წამლის სააგენტოს (EMA) მიერაც. 2022 წლის ივნისში, მედიკამენტი იაპონიის ჯანდაცვის, შრომისა და კეთილდღეობის სამინისტრომაც დაამტკიცა, ქვედა ასაკობრივი შეზღუდვის გარეშე.
მშობლები ამბობენ, რომ დასაკარგი დრო აღარ აქვთ, რადგან მას შემდეგ, რაც ბავშვები გარკვეულ ასაკს მიაღწევენ, მედიკამენტი ეფექტური აღარ იქნება.
