ტელეკომპანია „პირველის“ ჟურნალისტ ნატო გოგელიაზე თავდასხმასთან დაკავშირებით, სასამართლო განჩინების საფუძველზე, პრორუსული პარტია „ალტ-ინფოს“ წევრი და ოზურგეთის ოფისის ხელმძღვანელი მამუკა ანდღულაძე დააკავეს. სპეციალური საგამოძიებო სამსახურის ინფორმაციით, დაკავებულს ბრალად ჟურნალისტისთვის პროფესიულ საქმიანობაში უკანონოდ ხელის შეშლა, ძალადობა და სხვისი ნივთის დაზიანება ედება.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
გამოძიებით დადგინდა, რომ 2023 წლის 15 მარტს, ოზურგეთის რაიონის სოფელ ბახვში რეპორტაჟზე მუშაობის დროს, ბრალდებულმა, ნატო გოგელიას პროფესიულ საქმიანობაში ხელის შეშლის მიზნით, ფიზიკური შეურაცხყოფა მიაყენა, წაართვა მობილური ტელეფონი და დაუზიანა.
„აღნიშნული ქმედებით, ჟურნალისტს პროფესიული საქმიანობის განხორციელებაში ხელი შეეშალა, კერძოდ, ვერ განახორციელა სიუჟეტის ჩაწერა, ხოლო ძალადობის შედეგად განიცადა ფიზიკური ტკივილი“, - განაცხადეს საგამოძიებო სამსახურში.
მამუკა ანდღულაძე ერთ-ერთია „ალტ-ინფოს“ წევრებს შორის, რომლებმაც 14 მარტს, თბილისში, პარლამენტის შენობასთან აღმართული ევროკავშირის დროშა ჩამოხსნეს და დაწვეს. გოგელიაზე თავდასხმამდე მამუკა ანდღულაძემ გურიის გუბერნატორის ადმინისტრაციის წინ არსებული ევროკავშირის დროშის მოხსნაც სცადა, თუმცა დაცვის პოლიციამ ამის საშუალება არ მისცა.
მამუკა ანდღულაძე სისხლის სამართლის კოდექსის 154-ე მუხლის მეორე ნაწილით (ჟურნალისტისთვის პროფესიულ საქმიანობაში უკანონოდ ხელის შეშლა ძალადობის მუქარით), 126-ე მუხლის პირველი ნაწილით (ცემა ან სხვაგვარი ძალადობა) და 187-ე მუხლის პირველი ნაწილით (სხვისი ნივთის დაზიანება ან განადგურება) არის დაკავებული. დანაშაულებისთვის მაქსიმალური სასჯელი 2 წლით თავისუფლების აღკვეთაა.
სპეციალურმა საგამოძიებო სამსახურმა 2022 წელს, ჟურნალისტების მიმართ ჩადენილ დანაშაულებთან დაკავშირებით 12 სისხლის სამართლის საქმე აღძრა. როგორც სამსახურში აცხადებენ, სისხლისსამართლებრივი დევნა 7 პირის მიმართ დაიწყო.
