სომხეთის პარლამენტმა 3 ოქტომბერს სისხლის სამართლის საერთაშორისო სასამართლოს, იგივე ჰააგის სასამართლოს დამფუძნებელი „რომის სტატუტის“ რატიფიცირება მოახდინა. გადაწყვეტილებას მხარი მმართველი პარტიის „სამოქალაქო შეთანხმების“ 60-მა დეპუტატმა დაუჭირა, 22 კი წინააღმდეგი იყო. დოკუმენტი საბოლოოდ რატიფიცირებულად მიიჩნევა მას შემდეგ, რაც მას ხელს მოაწერს სომხეთის პრეზიდენტი ვააგნ ხაჩატრიანი.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
რატიფიკაციამდე რუსეთის საგარეო საქმეთა სამინისტრომ სომხეთის ხელისუფლება გააფრთხილა, რომ ამ გადაწყვეტილებას რუსეთ-სომხეთის ურთიერთობებისთვის უკიდურესად ნეგატიური შედეგები მოჰყვება.
როგორც ცნობილია, 2023 წლის 17 მარტს, ჰააგის სისხლის სამართლის საერთაშორისო სასამართლომ რუსეთის ფედერაციის პრეზიდენტის, ვლადიმერ პუტინის და ასევე, ბავშვის უფლებების საკითხებში პრეზიდენტის რწმუნებულის, მარია ლვოვა-ბელოვას დაპატიმრების ორდერები გასცა. ორივე მათგანს ბრალი ედებათ ომის დანაშაულში, კერძოდ, უკრაინის ოკუპირებული ტერიტორიებიდან ბავშვების უკანონო დეპორტაციაში.
თუ ვლადიმერ პუტინი „რომის სტატუტის“ ხელმომწერ რომელიმე ქვეყანაში ჩავა, ის უნდა დააკავონ.
სომხეთის პრემიერ-მინისტრის, ნიკოლ ფაშინიანის მტკიცებით, „რომის სტატუტის“ რატიფიცირება რუსეთის წინააღმდეგ მიმართული ქმედება არ არის. მისი განმარტებით, სომხეთის რესპუბლიკა აპირებს მიმართოს სისხლის სამართლის საერთაშორისო სასამართლოს აზერბაიჯანისთვის პასუხისმგებლობის დაკისრების მიზნით, კერძოდ, 2022 წლის სექტემბრის მოვლენებთან და სხვა ეპიზოდებთან დაკავშირებით.
რუსეთის პრეზიდენტის პრესსპიკერმა დიმიტრი პესკოვმა სომხეთის პარლამენტის მიერ „რომის სტატუტის“ რატიფიცირებას არაკორექტული გადაწყვეტილება უწოდა, რაც „სომხეთის მოქმედი ხელმძღვანელობისადმი დამატებით კითხვებს აჩენს“.
პესკოვის განცხადებით, რუსეთს არ სურს, რომ ვლადიმერ პუტინს ოდესმე სომხეთში ვიზიტზე უარის თქმა შეიძლება მოუწიოს.
