აშშ-ის დახმარების შეჩერება სეისმური მონიტორინგის ცენტრს არ შეეხება - გოდოლაძე

„მივიღეთ დამატებითი განმარტება, რომ 95 მილიონი აშშ დოლარის დახმარება, რომელიც განკუთვნილი იყო ამერიკის შეერთებული შტატების მთავრობის მხრიდან საქართველოს მთავრობისათვის დაპაუზებულია.

ეს არ შეეხება ჩვენს ინსტიტუტს, რადგან აშშ-ში ძალიან კარგად ესმით, თუ რა დიდი მნიშვნელობა აქვს ხალხისა და ქვეყნის უსაფრთხოებას, ამიტომ ისინი ეჭვქვეშ არ აყენებენ, როგორც საქართველოს, ასევე ნებისმიერი სხვა ქვეყნის მოქალაქეების სასიცოცხლოდ მნიშვნელოვანი ინსტიტუციის შეუფერხებელ მუშაობას.

ამიტომ მიყვარს ეს ქვეყანა. 25 წელი ერთად ვაშენეთ არა მარტო საქართველოს, არამედ რეგიონის სეისმური ინფრასტრუქტურა და ზუსტად ვიცი, რომ ისინი საქართველოს არასდროს გასაჭირში არ მიატოვებენ“, - წერს თეა გოდოლაძე სოციალურ ქსელში.

ორი დღის წინ მეცნიერმა გაავრცელა ინფორმაცია, რომ აშშ-ის დახმარება ინსტიტუტსაც შეუჩერდა, რადგან ილიას სახელმწიფო უნივერსიტეტი სახელმწიფო სსიპ-ია. Facebook-ზე გამოქვეყნებულ პოსტში თეა გოდოლაძე აღნიშნავდა, რომ 25 წლის განმავლობაში, ამერიკული დახმარებით არაერთი პროექტი განახორციელეს, მათ შორის, აშშ აფინანსებდა სეისმური საფრთხის რუკების განახლებას, მონიტორინგის სისტემების მოვლისა და შენახვისთვის საჭირო სამუშაოების უდიდეს ნაწილს.

„ქართული ოცნების“ მიერ ე.წ. „უცხოეთის აგენტების“ შესახებ რუსული კანონის მიღების გამო, აშშ-მა საქართველოსთან ურთიერთობების ყოვლისმომცველი გადახედვა დაიწყო. 31 ივლისს, სახელმწიფო მდივანმა ენტონი ბლინკენმა განაცხადა, რომ აშშ-მა შეაჩერა 95 მილიონ დოლარზე მეტი დახმარება, რომელსაც პირდაპირი სარგებელი მოჰქონდა საქართველოს მთავრობისთვის. აღნიშნული თანხა ლუგარის ლაბორატორიისა და დაავადებათა კონტროლის ეროვნული ცენტრის პროექტების დაფინანსებასაც მოიცავს. საქართველოს პრემიერ-მინისტრმა, ირაკლი კობახიძემ განაცხადა, რომ „ამ თანხის შინაარსს“ ვერ მიაგნეს.