ჟურნალისტთა დაცვის კომიტეტი (CPJ) და კიდევ ათი ავტორიტეტული უფლებადამცველი ორგანიზაცია საქართველოს პრეზიდენტს, სალომე ზურაბიშვილს მოუწოდებენ, გამოიყენოს თავისი აღმასრულებელი უფლებამოსილება ტელეკომპანია „მთავარი არხის“ დირექტორის, ნიკა გვარამიას ციხიდან „დაუყოვნებლივ და უპირობოდ“ გასათავისუფლებლად.
ახალი ამბები
მკითხველის რჩეული
- 1 მოროდიორი „კადიროველები“ ნიღბიან დამრბევებს შორის თბილისში - რედაქტორის სვეტი
- 2 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 3 პუტინის თქმით, საქართველოს ხელისუფლების სიმამაცით გაკვირვებულია
- 4 ოპოზიციური პარტიები 24 ნოემბერს პარლამენტთან აქციას და ღამისთევას აანონსებენ
- 5 პარლამენტი აღარ არსებობს, რადგან ერთმა პარტიამ თავზე დაიხია კონსტიტუცია - ზურაბიშვილი
- 6 არალეგიტიმური პრემიერი შსს-ს მომიტინგეებზე სასტიკი ძალადობისთვის მადლობას უხდის
სალომე ზურაბიშვილისთვის მიწერილ წერილში ადამიანის უფლებათა და პრესის თავისუფლების საერთაშორისო ორგანიზაციები, ქართველ ხალხს ულოცავენ უცხოეთის აგენტების შესახებ კანონპროექტების უკან გატანის წარმატებით მიღწევას, მიესალმებიან ზურაბიშვილის მიერ კანონპროექტის დაგმობასა და დემოკრატიული ღირებულებების მხარდაჭერას.
„დღეს გწერთ იმისთვის, რათა გთხოვოთ, პრესის თავისუფლებისთვის კიდევ ერთხელ დაიკავოთ უმნიშვნელოვანესი პოზიცია ჟურნალისტ ნიკა გვარამიას ციხიდან გასათავისუფლებლად თქვენი ძალაუფლების გამოყენებით... როგორც ადამიანი, რომელიც მოწოდებულია დაიცვას საქართველოს საერთაშორისო რეპუტაცია, თქვენ აღიარებთ, რომ შურისძიების მიზნით ჟურნალისტის პატიმრობა თქვენი ქვეყნისთვის შემაშფოთებელი გარდატეხის მომასწავებელია. მას შემდეგ, რაც 1992 წლიდან ჟურნალისტთა დაცვის კომიტეტმა პატიმრობაში მყოფი ჟურნალისტების შესახებ მონაცემების შედგენა დაიწყო, საქართველოში არცერთი ჟურნალისტი არ დაფიქსირებულა გისოსებს მიღმა. გვარამიას პატიმრობა, რაც საქართველოს ერთ რიგში აყენებს პოსტსაბჭოთა ევრაზიის რეპრესიულ, ავტორიტარულ სახელმწიფოებთან, თქვენი ქვეყნის რეპუტაციას აზიანებს“, - ნათქვამია საქართველოს პრეზიდენტისადმი წერილში.
ორგანიზაციები აღნიშნავენ, რომ სალომე ზურაბიშვილი, როგორც პრეზიდენტი, მუდმივად აცხადებს, რომ ევროპული ინტეგრაცია ქართველი ხალხის არჩევანია, გვარამიას გათავისუფლება კი მნიშვნელოვანი ნაბიჯი იქნებოდა ამ ევროპული მისწრაფებების შესასრულებლად, ასევე, საქართველოს დემოკრატიული მომავლის გასაძლიერებლად.
ჟურნალისტთა დაცვის კომიტეტის გარდა, წერილს ხელს აწერენ ისეთი ცნობილი და ავტორიტეტული ორგანიზაციები, როგორებიცაა: მე-19 მუხლი; ევროპელი ჟურნალისტების ასოციაცია (AEJ); პრესისა და მედიის თავისუფლების ევროპული ცენტრი (ECPMF); ჟურნალისტების ევროპული ფედერაცია (EFJ); ჰიუმან რაითს ვოჩი (HRW); ჟურნალისტური სამართლიანობის ფონდი; ცენზურის ინდექსი; საერთაშორისო პრესის ინსტიტუტი (IPI); საერთაშორისო პენკლუბი (PEN International); რეპორტიორები საზღვრების გარეშე(RSF).
16 მაისს ერთი წელი გახდება, რაც ტელეკომპანია „მთავარი არხის“ დამფუძნებელი და გენერალური დირქტორი ნიკა გვარამია პატიმრობაშია. 2022 წლის 2 ნოემბერს, თბილისის სააპელაციო სასამართლოს კოლეგიამ გვარამიასთვის გამოტანილი გამამტყუნებელი განაჩენი სასჯელის ნაწილში უცვლელი დატოვა და 3.6 წლით თავისუფლების აღკვეთა განუსაზღვრა. სააპელაციო სასამართლომ პირველი ინსტანციის განაჩენი ნაწილობრივ შეცვალა. კერძოდ, ნიკა გვარამია დაპატიმრებული იყო „რუსთავი 2“-ის კუთვნილი ავტომობილის პირადი მიზნების გამოყენებისთვის (უფლებამოსილების ბოროტად გამოყენება), რადგან თბილისის საქალაქო სასამართლომ, 2022 წლის 16 მაისის განაჩენით, მას ბრალდების მეორე ეპიზოდზე - „რუსთავი 2“-სთვის 6 763 509 ლარის ზიანის მიყენების ნაწილში მხოლოდ ჯარიმა დააკისრა 50 ათასი ლარის ოდენობით. სააპელაციო სასამართლომ მას ამ ეპიზოდზეც პატიმრობა მიუსაჯა.
ცოტა ხნის წინ, საქართველოს პრეზიდენტმა ნიკა გვარამიას შეწყალებასთან დაკავშირებით განაცხადა, რომ მის მიმართ პირადი წყენა არ აქვს და ეს საკითხი ღიაა. ამასთან, სალომე ზურაბიშვილმა აღნიშნა, რომ შეწყალება პრეზიდენტის დისკრეციული უფლებაა და „ეს უნდა იყოს თავისუფალი გადაწყვეტილება“.
