საქართველოს მთავრობა გელათის სამონასტრო კომპლექსის სარესტავრაციო, სარეკონსტრუქციო და საკონსერვაციო სამუშაოებისთვის საპატრიარქოს დამატებით 7 500 000 ლარით დააფინანსებს.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 აქციებზე ჟურნალისტებისთვის მუშაობაში უკანონოდ ხელის შეშლის ფაქტებზე გამოძიება დაიწყო
- 6 ბჟანიას ქართველი დეპუტატები აფხაზეთში ფარულად ჩამოჰყავდა - არძინბა
პრემიერ-მინისტრ ირაკლი კობახიძის განკარგულებით, აღნიშნულ თანხას ფინანსთა სამინისტრო 2024 წლის ბიუჯეტით გათვალისწინებული რეგიონებში განსახორციელებელი პროექტების ფონდიდან კულტურული მემკვიდრეობის დაცვის ეროვნულ სააგენტოს გამოუყოფს, შემდეგ კი სააგენტო საქართველოს მართლმადიდებელ ეკლესიას გადაურიცხავს.
გელათის სამონასტრო კომპლექსში რეაბილიტაციას კულტურის სამინისტრო ახორციელებდა, თუმცა ერთი წლის წინ, 2023 წლის თებერვლის ბოლოს, უწყებამ სამუშაოები საპატრიარქოს გადააბარა. ამას წინ უძღოდა საპატრიარქოს განცხადება იმის შესახებ, რომ „გელათის საკათედრო ტაძრის 21-ე საუკუნის კრიზისი 2015-2019 წლებში შესრულებული სარეაბილიტაციო სამუშაოების შედეგად დაიწყო“, 2021 წელს კი კედლის მხატვრობა მძიმე მდგომარეობაში აღმოჩნდა. საპატრიარქოს ამ განცხადებამდე ცოტა ხნით ადრე გელათის ფრესკების დაზიანების შესახებ კრიტიკული და საგანგაშო დასკვნა გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის ეროვნულმა კვლევითმა ცენტრმა გამოაქვეყნა. ანგარიშში სისხლის სამართლის დანაშაულის ნიშნების შემცველი არაერთი ფაქტია გამოვლენილი, თუმცა პასუხისგებაში ამ დრომდე არავინ არის მიცემული.
ცოტა ხნის წინ გელათის სამონასტრო კომპლექსის ძირითად ტაძარში კედლის მხატვრობის კონსერვაციის სამუშაოები დაიწყო.
აღსანიშნავია, რომ საქართველოს მართლმადიდებელი ეკლესია სახელმწიფო ბიუჯეტიდან ყოველწლიურად 25 მილიონ ლარს იღებს. მიმდინარე წელს ამ თანხას დაემატა 35 მილიონიც, რომელიც ირაკლი კობახიძის 15 მარტის განკარგულების საფუძველზე, საპატრიარქოს მიერ დაფუძნებული დაწესებულებების „ფინანსური დახმარების უზრუნველყოფის მიზნით“ გამოიყო. 35 მილიონი ლარიდან 22 157 000 ლარს საპატრიარქოს განათლებისა და კულტურული ღონისძიებების განვითარების ფონდი მიიღებს, ხოლო 485 000 ლარს - წმინდა მეფის სახელობის გიმნაზია. დანარჩენი თანხები საპატრიარქოს ქვეშ მოქმედ სხვადასხვა სასწავლო დაწესებულებაზე განაწილდება.
სოციალური სამართლიანობის ცენტრის შეფასებით, საპატრიარქოსთვის დაფინანსების გაზრდა წინააღმდეგობაში მოდის სეკულარიზმისა და თანასწორობის კონსტიტუციურ პრინციპებთან. არასამთავრობო ორგანიზაცია აცხადებს, რომ არჩევნების წელს ეს გადაწყვეტილება „პოლიტიკურ მიზანს უფრო ატარებს და მას ეკლესიის ლოიალობის და საბოლოოდ რელიგიური სენტიმენტების მობილიზებით ელექტორალური მხარდაჭერის მოპოვების დანიშნულება აქვს“.
