საქართველოს პარლამენტში პლენარული სხდომა 10 მარტს, 12:00 საათისთვის ჩაინიშნა. რუსთაველის გამზირზე მრავალათასიანი საპროტესტო აქციების შემდეგ, საპარლამენტო უმრავლესობა „უცხოური გავლენის გამჭვირვალობის“ შესახებ კანონს მეორე მოსმენაზე გაიტანს და ჩააგდებს. პლენარულ სხდომამდე 15 წუთით ადრე, 11:45 საათზე ბიუროს სხდომაა ჩანიშნული.
ახალი ამბები
მკითხველის რჩეული
- 1 „გამოვძებნით ძალას, რათა ბოდიში მოვიხადოთ“ - ივანიშვილი 2008 წლის ომზე
- 2 ვის მოვუხადოთ ბოდიში შინდისის გმირების ოჯახებმა? - გამოხმაურება ივანიშვილის განცხადებაზე
- 3 კობახიძემ დააკონკრეტა რომელი ოპოზიციური პარტიების აკრძალვას გეგმავს „ქართული ოცნება“
- 4 „ძლიერი საქართველოს“ საგარეჯოს ორგანიზაციის წევრს სასამართლომ გირაო შეუფარდა
- 5 რასაც ახლა საქართველოს ხელისუფლება აკეთებს, ეროვნული იდენტობის გაცნობიერებაა - ლავროვი
- 6 2025 წლიდან გიორგი მამარდაშვილი „ლივერპულის“ მეკარე გახდება
პარლამენტის შენობასთან ათობით ათასი ადამიანი დღესაც შეიკრიბა. დემონსტრანტების მთავარი მოთხოვნები ყოფილმა სახალხო დამცველმა ნინო ლომჯარიამ გააჟღერა - პარლამენტმა დაუყოვნებლივ გამართოს პლენარული სხდომა, სადაც რუსულ კანონს ოფიციალურად ჩააგდებს და შინაგან საქმეთა სამინისტრომ გაათავისუფლოს აქციების დარბევისას დაკავებული ყველა პირი.
საქართველოში ამერიკის შეერთებული შტატების საელჩომ მმართველ პარტიას დღეს დაჟინებით მოუწოდა, ოფიციალურად უარყოს კანონპროექტი და აღარ მიჰყვეს ამ ტიპის კანონმდებლობას, რომელიც შეუთავსებელია ქართულ და ევროპულ ღირებულებებთან და ფუნდამენტური თავისუფლებების დაცვასთან.
პარლამენტის აპარატის მიერ, 9 მარტს, დილით გავრცელებული განცხადების თანახმად, მიმდინარე კვირაში პლენარული სხდომები გაუქმებული იყო, რადგან 7-8 მარტს აქციის მონაწილეთა ნაწილის მხრიდან ძალადობრივი ქმედებების შედეგად ზიანი მიადგა პარლამენტის შენობასა და ინფრასტრუქტურას.
7-8 მარტს რუსული კანონის მიღების წინააღმდეგ პარლამენტთან მრავალათასიანი საპროტესტო აქციები გაიმართა. ორივე აქცია შინაგან საქმეთა სამინისტრომ სპეცრაზმის მეშვეობით დაარბია. ხელისუფლებამ მშვიდობიანი დემონსტრანტების წინააღმდეგ ცრემლსადენი გაზი, წყლის ჭავლი და სხვა საშუალებები მასობრივად გამოიყენა. სპეცდანიშნულების რაზმის თანამშრომლები აქციის მონაწილეებს ფიზიკურად უსწორდებოდნენ. 8 მარტის ღამეს საპროტესტო აქციის მონაწილეთა უმოწყალოდ დარბევისა და დაშლის შემდეგ, დემონსტრანტები სპეცრაზმს დაუპირისპირდნენ და მათ მანქანებს ქვები დაუშინეს. პარლამენტის მიმდებარედ ქუჩებში დააზიანეს და დაწვეს პოლიციის ავტომანქანები, ჩაამსხვრიეს პარლამენტის შენობის შუშები. შინაგან საქმეთა სამინისტრომ ორ დღეში საპროტესტო აქციების 134 მონაწილე დააკავა.
9 მარტს, „ქართულმა ოცნებამ“ მიიღო გადაწყვეტილება, რომ „უცხოური გავლენის გამჭვირვალობის შესახებ“ კანონპროექტს უკან გაიწვევს. როგორც ფრაქციის თავმჯდომარემ, მამუკა მდინარაძემ განაცხადა, პარლამენტის თავმჯდომარემ უკვე გაგზავნა ვენეციის კომისიაში თავისი წერილი კანონპროექტების გამოხმობის შესახებ. მისივე თქმით, კანონპროექტს პარლამენტის უახლოეს სხდომაზე ჩააგდებენ და ამ პოლიტიკურ გადაწყვეტილებას „უკან ვერავინ წაიღებს“. რაც შეეხება მეორე კანონპროექტს, როგორც მდინარაძე ამბობს, ის უკვე გამოწვეულია.
საპარლამენტო უმრავლესობამ „უცხოეთის აგენტების“ შესახებ კანონი 7 მარტს, 78 დეპუტატის მხარდაჭერით, პირველი მოსმენით მიიღო.
