ტურავას თქმით, რუსული კანონზე კონსტიტუციურ სარჩელებს „გონივრულ ვადებში“ განიხილავენ

„თქვენ გინდათ კონკრეტული თარიღი გითხრათ, მაგრამ უფლებამოსილი არ ვარ, რადგან არ ვიცი ჩემი კოლეგების პოზიცია. გადაწყვეტილება გონივრულ ვადებში იქნება მიღებული. კანონი არა მარტო უნდა წავიკითხოთ, არამედ შედარებითი სამართლის კვლევა უნდა ჩავატაროთ და ამას ერთ თვემდე მაინც დასჭირდება. ვადებს საკონსტიტუციო სასამართლოს პლენუმი განსაზღვრავს. ამ ეტაპზე მოსამართლეები სარჩელებს სწავლობენ“, - თქვა ტურავამ მედიასთან.

ტელეკომპანია „პირველის“ ჟურნალისტის რეპლიკაზე, რომ საქართველოს ევროპელი და ამერიკელი პარტნიორების შეფასებით, „ეს არის რუსული კანონი და ჩვენ პირდაპირ წავალთ რუსეთში“, ტურავამ განაცხადა:

„ვნახავთ, წავიკითხავთ… რომელ რუსეთში? ჩრდილოეთისკენ? რა ვიცი, მე ყოველი შემთხვევისთვის ასეთი მიმართულება ჩემი თავისთვის და ჩემი ქვეყნისთვის არ მიმიცია. არ მგონია, რომ ჩვენი სახელმწიფოს მიზანი, იდეა იყოს ჩრდილოეთისკენ სვლა. წლების მანძილზე ვიყავი სტიპენდიანტიც, მქონდა პრემიაც და სხვადასხვაგვარი უცხოური დაფინანსება“.

დღეის მდგომარეობით, რუსული კანონის წინააღმდეგ საკონსტიტუციო სასამართლოში სამი სარჩელია წარდგენილი. პრეზიდენტის, 121 მედია და არასამთავრობო ორგანიზაციის სარჩელების შემდეგ, დღეს საკონსტიტუციო სასამართლოს პარლამენტის 38-მა ოპოზიციონერმა დეპუტატმაც მიმართა.

მოსარჩელეები მიიჩნევენ, რომ კანონი ეწინააღმდეგება კონსტიტუციის 78-ე მუხლს, რომელიც ყველა კონსტიტუციურ ორგანოს ავალდებულებს, თავიანთი უფლებამოსილების ფარგლებში მიიღონ ყველა ზომა ევროკავშირსა და ჩრდილოატლანტიკური ხელშეკრულების ორგანიზაციაში (NATO) საქართველოს სრული ინტეგრაციის უზრუნველსაყოფად. მოსარჩელეები საქმეზე საბოლოო გადაწყვეტილების მიღებამდე დროებითი ღონისძიების გამოყენებას და 3 სექტემბერს კანონის ამოქმედების შეჩერებას ითხოვენ.